Mbretëria e Bashkuar ka reaguar pas aktgjykimit të Dhomave të Specializuara në Hagë ndaj ish-krerëve të UÇK-së, duke ritheksuar mbështetjen për Kosovën dhe duke bërë thirrje për qetësi pas vendimit.
Ministri britanik për Evropën, Stewart Wood, ka deklaruar se Londra respekton pavarësinë e Gjykatës dhe procesin e saj gjyqësor, ndërsa ka theksuar se Mbretëria e Bashkuar mbetet e përkushtuar ndaj drejtësisë, llogaridhënies dhe pajtimit në rajon.
“Mbretëria e Bashkuar mbetet mike dhe partnere e afërt e Kosovës, duke mbështetur fuqishëm sovranitetin, pavarësinë dhe integritetin e saj territorial, si dhe paqen në Ballkanin Perëndimor”, ka deklaruar Wood.
Ai ka rikujtuar edhe rolin e Britanisë së Madhe në ndërhyrjen e NATO-s në vitin 1999 dhe mbështetjen për Kosovën.
“Jemi krenarë për rolin që luajtëm së bashku me aleatët e NATO-s në ndihmën për parandalimin e një katastrofe humanitare në vitin 1999 dhe në mbështetjen e pavarësisë së Kosovës në vitin 2008”, ka thënë Wood.
Duke komentuar aktgjykimin, ministri britanik e ka cilësuar atë si një moment të rëndësishëm, por ka bërë të qartë se vendimi lidhet me individët e gjykuar dhe jo me statusin e Kosovës.
“Aktgjykimi i sotëm është një moment i rëndësishëm, por nuk është një gjykim për shtetësinë, sovranitetin apo të drejtën e Kosovës për të përcaktuar të ardhmen e saj”, ka deklaruar ai.
Wood u ka bërë thirrje liderëve politikë dhe figurave publike që të tregojnë përgjegjësi në reagimet e tyre dhe të shmangin çdo veprim që mund të rrisë tensionet.
“Gjetjet e Gjykatës kanë të bëjnë me individë dhe nuk duhet të përdoren për të nxitur tensionet ndërmjet komuniteteve apo në mbarë rajonin”, ka thënë Wood.
Ai ka shtuar se në këtë periudhë, prioritet duhet të jetë ruajtja e qetësisë dhe sigurisë.
“Në këtë moment të rëndësishëm, liderët politikë dhe figurat publike kanë përgjegjësi të promovojnë qetësinë, të sigurojnë që çdo reagim të mbetet paqësor dhe të vendosin sigurinë e njerëzve mbi të gjitha”, ka deklaruar ministri britanik.
Në fund, Wood ka theksuar se Mbretëria e Bashkuar do të vazhdojë bashkëpunimin me partnerët në rajon për të mbështetur paqen, drejtësinë dhe sigurinë për të gjitha komunitetet.
