“Hashim Thaçi është shpallur i pafajshëm”.
Ky ishte njëri prej lajmeve që qarkulloi në rrjete sociale, duke krijuar përshtypjen se aktgjykimi për ish-presidentin tashmë ishte marrë.
Por, lajmi është i rremë.
E i tillë ishte edhe pretendimi se një autokolonë e gjatë me mjete ushtarake serbe po lëvizte drejt kufirit me Kosovën, vetëm dy ditë para shpalljes së aktgjykimit ndaj ish-krerëve të UÇK-së në Hagë.
Dy lajme të rreme, në një periudhë kur vëmendja e qytetarëve është e përqendruar te vendimi që pritet të merret të mërkurën.
E pikërisht në situata të tilla, kur emocionet janë të larta dhe informacioni pritet me interes të madh, hapësirë gjejnë edhe dezinformatat.
Profesori universitar, Alban Zeneli, thotë se emocionet e publikut janë një prej elementeve që shfrytëzojnë dezinformuesit.
“Dezinformimi shfrytëzon emocionin për me mbërritë te publiku. Në këtë situatë të paqartë, deri në vendimin e Gjykatës, do të kemi informacione të tilla të cilat do të jenë të paverifikuara. Sepse dezinformuesit këto periudha kohore, kur shoqëria ka tension brenda, i shfrytëzojnë emocionet e tyre me prodhu dezinformata të cilat gjenerojnë klikime. Pra, qëllimi kryesor është financiar”, ka thënë profesori universitar, Alban Zeneli.
Eksperti i platformës “Hibrid”, Festim Rizanj, thotë se lajmet e pakonfirmuara mund të krijojnë një realitet tjetër te publiku.
“Këto lajme që qarkullojnë me idenë me paraqitë një realitet krejt tjetër ndikojnë te qytetarët, sidomos në situata të tilla të ndjeshme. Pra, duke mos e verifiku specifikisht, duke spekuluar në disa raste për disa zhvillime që do të mund të ndodhin ose janë në ndodhje e sipër, mund të ndikojnë te qytetarët me kriju panik, një realitet tjetër për atë se çka po ndodh”, u shpreh eksperti i platformës “Hibrid”, Festim Rizanj.
E në ditët kur një informacion mund të përhapet brenda pak minutash, verifikimi mbetet mënyra kryesore për të mos rënë pre e lajmeve të rreme.
Zeneli u bën thirrje qytetarëve që të mos i marrin si të mirëqena informacionet që qarkullojnë, veçanërisht kur ato lidhen me zhvillime të ndjeshme.
“Secili qytetar që këto ditë lexon lajme specifikisht të lidhura me sigurinë, me gjëra të tjera me rëndësi, është që të rezonojë, t’i gjykojë ato lajme dhe të mos i marrë krejtësisht si të mirëqena. Për faktin se është periudhë e ndjeshme kohore dhe rrjedhimisht potenciali që ato me qenë të rreme është më i madh”, ka thënë tutje profesori universitar, Alban Zeneli.
Kësisoj vendimi për katërshen e UÇK-së do të merret të mërkurën, me fillim nga ora 10:00.
