Përmes komunikatës, Zyra e Kryeministrit bëri të ditur se Kurti i përgëzoi sportistët dhe trajnerët për sukseset e arritura, teksa ka shprehur mirënjohjen dhe falënderimin për angazhimin.
“Kryeministri i përgëzoi sportistët dhe trajnerët e tyre për sukseset e arritura në Lojërat Mesdhetare. Ai u shprehu mirënjohjen dhe falënderimin për angazhimin dhe përkushtimin e jashtëzakonshëm për fitore, duke e rikonfirmuar vazhdimisht potencialin e rinisë sonë të talentuar”, thuhet ndër tjerash në njoftim.
Në pjesëmarrjen e dytë në Lojërat Mesdhetare, gjatë korrikut 2022, Kosova u përfaqësua me 39 sportistë nga 13 sporte të ndryshme: xhudo, boks, karate, mundje, shenjëtari, shigjetari, tenis, gjimnastikë, not, atletikë, taekëondo, badminton dhe pingpong.
Prej gjithsej 8 xhudistëve pjesëmarrës nga Kosova në këtë garë, medalje fituan 5 xhudistë. Me këtë rezultat Kosova u bë shteti i dytë më i suksesshëm pas Spanjës, në sportin e xhudos në Lojërat Mesdhetare Oran 2022.
Medalja e bronztë e fituar nga Shpejtim Bajoku është medalja e parë e fituar pas 31 vitesh në Lojërat Mesdhetare, kur këtë sukses e kishte arritur boksieri Ilir Mustafa në vitin 1991 në Athinë, duke fituar medalje të argjendtë, derisa ishte reprezentues i ish-Jugosllavisë.
