Inspektorati Qendror i Punës ka ndaluar punimet në dy kantiere ndërtimi në komunat e Drenasit dhe Gjakovës, pas konstatimit të shkeljeve të rënda të rregullave për sigurinë dhe shëndetin në punë.
Sipas Inspektoratit, gjatë kontrolleve janë evidentuar parregullsi që paraqisnin rrezik serioz për jetën dhe shëndetin e punëtorëve.
Si rezultat i këtyre gjetjeve, është marrë vendim për ndalimin e menjëhershëm të punimeve në të dy kantieret, deri në eliminimin e plotë të parregullsive.
Subjektet e inspektuara janë obliguar që t’i adresojnë të gjitha mangësitë e konstatuara. Punimet do të mund të rifillojnë vetëm pasi inspektorët të verifikojnë se janë përmbushur kërkesat ligjore dhe standardet e sigurisë dhe shëndetit në punë.
Inspektorati Qendror i Punës ka bërë të ditur se do të vazhdojë kontrollet në të gjithë territorin e Kosovës dhe do të ndërmarrë masa ndaj subjekteve që cenojnë sigurinë e punëtorëve.
Njëkohësisht, institucionet u kanë bërë thirrje punëdhënësve që të respektojnë legjislacionin dhe të garantojnë kushte të sigurta pune, duke theksuar se mbrojtja e jetës dhe shëndetit të punëtorëve mbetet prioritet./teve1.info/
