Prej 12 gushtit, Dukagjin Maxhuni ndodhej në burgun e Beogradit.
Ai ishte arrestuar gjatë kalimit të kufirit nga Serbia në Kroacia, saktësisht në Batrovc, dhe akuzohej për krime lufte.
Gati një muaj pas, Maxhuni është liruar.
Tëvë1 ka kontaktuar me familjen Maxhuni, të cilët kanë konfirmuar se familjari i tyre ka mbërritur shëndosh e mirë në shtëpi.
Megjithatë, për shkak të gjendjes emocionale, vëllau, Përparimi, ka thënë se nuk mund të flasin para kamerës.
E lajmin për lirim, e dha avokati Arianit Koci, i angazhuar në rast.
“Që atë ditë kam thënë se Dukagjini nuk është fajtor dhe se pretendimet ndaj tij nuk qëndrojnë. Sot është i lirë!Po kthehet te familja e vet. Ka edhe qytetarë të tjerë tanë që po mbahen padrejtësisht. Mundësitë i kam të kufizuara, por do ta bëj edhe të pamundurën në aspektin profesional, për lirimin e tyre. Kudo dhe kurdo që një qytetar i yni ka nevojë për ndihmë, do të angazhohem për të. Ky është misioni im”, tha Arianit Koci.
Rikthimit të Maxhunit në shtëpi i janë gëzuar edhe në Organizatën e Veteranëve të Luftës, ani pse tregojnë se i arrestuari nuk ishte pjesë e UÇK-së gjatë luftës.
“E kemi bërë fillimisht verifikimin e listave tona që i kemi të veteranevt ëUCK-së që i kemi në organizatë dhe ka rezulto që nuk është anëtar i OVL-së dhe as luftetarë i UCK-së, por që vellau i tij është ushtar i UCK-së sot kemi marrë lajmin që është liruar dhe i gëzohemi faktit që është liruar dhe ju kemi bërë thirrje edhe më herët gjithë bashkluftetarëve tanë mos me marrë atë rrugë”, deklaroi Gazmend Syla nga OVL e UÇK-së.
Arrestimet e kosovarëve në Serbi, e kanë shqetësuar edhe Këshillin për Mbrojtjen e Lirive dhe të Drejtave të Njeriut. Prandaj, bëjnë thirrje që kalimi nëpër Serbi të shmanget.
“Kjo është shumë lehtë e evitueshme nëse qytetarët e Kosovës të cilët kanë dyshime që mund trajtohen nga Serbia përmes arrestimit apo gjykimit nuk duhet të kalojnë në Serbi e nëse kalojnë përgjigjesin mbi vet e nuk duhet të llogarisin që shteti të ndihmojë, pasi Kosova dhe Serbia nuk kanë ndonjë bashkëpunim juridik dhe nuk mund të intervenohen drejtpërdrejtë”, tha Behxhet Shala nga KMDLNJ.
Viteve të fundit janë shpeshtuar rastet e arrestimit të shqiptarëve nga autoritet serbe.
