Ambasadori i ri i Bashkimit Evropian në Kosovë, diplomati gjerman Dirk Schuebel, ka bërë thirrje për formimin sa më të shpejtë të institucioneve të Kosovës, duke theksuar se funksionaliteti i tyre është i domosdoshëm për zbatimin e reformave dhe shfrytëzimin e mbështetjes së ofruar nga BE-ja.
Në një komunikatë të Zyrës së BE-së në Kosovë, me rastin e marrjes së detyrës, Schuebel tha se Kosova ka nevojë për institucione funksionale dhe efektive, të afta për të përmbushur reformat e nevojshme dhe për të përfituar nga mekanizmat financiarë të Bashkimit Evropian.
“Për të mirën e të gjithë qytetarëve të saj, Kosovës i duhen institucione funksionale, të afta për t’i zbatuar reformat e nevojshme dhe për ta shfrytëzuar plotësisht Planin e Rritjes të BE-së dhe financimin e ardhshëm mjaft të konsiderueshëm të IPA-s”, tha Schuebel.
Sipas tij, Kosova ndodhet përpara një periudhe me mundësi të rëndësishme, por shfrytëzimi i tyre kërkon përgjegjësi politike, institucione efektive dhe një fokus të qartë në reformat dhe agjendën e integrimit evropian.
Schuebel tha se gjatë mandatit të tij do të punojë me institucionet e Kosovës për ta mbështetur vendin në rrugën drejt integrimit në Bashkimin Evropian.
“Do ta mbështes të ardhmen evropiane të Kosovës. Puna drejt saj kërkon angazhimin e tërë shoqërisë dhe përkushtim të përbashkët për ta bërë integrimin në BE prioritet, përtej ndarjeve politike”, deklaroi ai.
Ambasadori i ri i BE-së theksoi gjithashtu rëndësinë e angazhimit konstruktiv të Kosovës në dialogun e lehtësuar nga Bashkimi Evropian me Serbinë.
Ai tha se do të mbështesë përparimin drejt normalizimit të marrëdhënieve, në bashkëpunim të ngushtë me Përfaqësuesin Special të BE-së për Dialogun, Peter Sorensen.
Në deklaratën e tij, Schuebel rikujtoi edhe mbështetjen e vazhdueshme të Bashkimit Evropian për Kosovën.
Sipas tij, që nga viti 1999, BE-ja ka ofruar mbi 3.7 miliardë euro ndihmë për vendin, duke përfshirë rindërtimin, forcimin e institucioneve, sundimin e ligjit, zhvillimin ekonomik dhe mundësitë për të rinjtë.
Schuebel vlerësoi gjithashtu Kosovën për përafrimin me politikën e jashtme dhe të sigurisë të Bashkimit Evropian, duke e cilësuar këtë si një element të rëndësishëm të bashkëpunimit ndërmjet Kosovës dhe BE-së.
Ndryshe, gjermani Schuebel mori detyrën e shefit të Zyrës së BE-së në Kosovë, duke e pasuar në këtë post estonezin, Aivo Orav.
Schuebel ka përvojë të gjatë diplomatike dhe karriera e tij është përqendruar kryesisht në politikën e jashtme të BE-së.
Ai ka shërbyer ambasador i BE-së në Bjellorusi nga viti 2019 deri më 2022 dhe më herët në Moldavi, nga viti 2009 deri më 2013.
Së voni, ai ka shërbyer si shef i divizionit për Rusinë në Shërbimin Evropian për Veprim të Jashtëm.
BE-ja po ashtu njoftoi se në postin e zëvendësshefit të BE-së në Kosovë është emëruar Alexis Hupin./teve1.info./
