Kryetari i Lidhjes Demokratike të Kosovës, Lumir Abdixhiku, ka folur për mundësinë e shkuarjes së vendit në zgjedhje të reja, pas zhvillimeve të fundit politike.
Abdixhiku tha se ende nuk e di përbërjen e listës zgjedhore të LDK-së, duke theksuar se vendimi për këtë çështje do të merret në kohën e duhur.
“‘Nuk e di kush do të jetë në listë, por do të vendoset me kohë. Po besoj që gjendja është shumë e rëndë sot. Nuk e di kush ka zell të shkojë drejt zgjedhjeve menjëherë”, deklaroi Abdixhiku para gazetarëve.
Ai kritikoi situatën politike në vend, duke thënë se Kosova po humb një mundësi për t’iu shmangur, siç e quajti ai, politizimit individual dhe përqendrimit të pushtetit.
“Gjithë kjo përpjekje për të pjekur, të mendojmë përtej zemërimit dhe t’i shërbejmë shtrirjes së pushtetit absolut nga një parti e vetme në Republikën e Kosovës. Do ta kuptojnë dhe do ta shohin këtë ditë shumë shpejt për ta kërkuar sërish”, tha ai.
Kreu i LDK-së u shpreh i zhgënjyer me zhvillimet brenda partisë dhe situatën e krijuar rreth procesit për zgjedhjen e presidentit.
“Edhe njëherë, unë vetëm ndjek Këshillin dhe kërkoj falje për popullin e Kosovës. Kaq munda, nuk munda më tepër. Jo me këtë grup parlamentar, jo me këtë përçarje, jo me këtë ndarje, nuk munda më tepër”, u shpreh Abdixhiku.
Sipas tij, ai është përpjekur që në këtë proces të vendosë në plan të parë interesin e Republikës.
“Jam përpjekur të jap një mendim të pjekur, fokusin e Republikës, me shumë pak gjasa, të një partie që ka pasur kërkesa absolute për president të vetin. Fatkeqësisht po humbim një mundësi të tillë për të ikur prej këtij politizimi individual”, tha Abdixhiku.
Ai shtoi se një qasje e tillë politike, sipas tij, nuk i përket kohës aktuale dhe se mund të ndryshojë në rrethana të tjera.
“Është politikë jo e kohës. Ndoshta kjo politikë po shfaqet, unë po mendoj do të vijë koha në një rrethanë tjetër”, përfundoi Abdixhiku.
