Prokuroria Themelore në Prizren ka kërkuar nga Gjykata Themelore në Prizren caktimin e masës së paraburgimit nga një muaj ndaj të dyshuarit B.D i cili gjendet në ndalim 48 orësh për shkak të dyshimit të se i njëjti ka kryer veprën penale “Vrasje e rëndë”.
Të enjten i dyshuari B.D pas një fjalosje me bashkëshorten e tij ka sulmuar fizikisht atë dhe e ka goditur se pas lëndimeve të shumta në kokë, viktima ka ndërruar jetë në vendin e ngjarjes.
“Sipas kërkesës së Prokurorisë, më datë 26.08.2026, rreth orës 00:05, në Prizren, në shtëpinë e tij familjare, i dyshuari, B.D., pas një fjalosjeje me bashkëshorten e tij, viktimën me inicialet L.D., e ka sulmuar fizikisht atë, dhe e ka goditur dhe përplasur disa herë kokën e viktimës në tokë, me ç’rast ajo ka pësuar lëndime të shumta në kokë dhe pjesë të tjera të trupit. Si pasojë e lëndimeve të pësuara, viktima ka ndërruar jetë në vendin e ngjarjes”, thuhet në njoftim.
Sipas Prokurorisë, i dyshuari ka tentuar të fshijë gjurmët e ngjarjes dhe më pas ka njoftuar familjarët për rastin.
“Prokuroria Themelore në Prizren mbetet e përkushtuar në luftimin e kriminalitetit, forcimin e sundimit të ligjit dhe sigurimin që secili person i dyshuar për kryerjen e veprave penale të përgjigjet para organeve të drejtësisë”, thuhet tutje në njoftim./teve1.info/
