Kompania për Distribuimin e Energjisë Elektrike në Kosovë (KEDS) ka njoftuar për ndërprerje të planifikuara të energjisë elektrike në disa komuna të vendit gjatë ditëve në vijim, për shkak të punimeve në rrjet, mirëmbajtjes preventive dhe realizimit të projekteve investive.
Sipas njoftimit, ndërprerjet do të prekin zona të Prishtinës, Gjilanit, Gjakovës, Pejës, Mitrovicës dhe Prizrenit.
Në Prishtinë, më 27 gusht, furnizimi me energji elektrike në një pjesë të Albanës së Madhe do të ndërpritet nga ora 10:30 deri në 15:30, për shkak të vendosjes së kabllos ABC.
Në Gjilan, nga ora 10:00 deri në 15:30, pa energji do të mbesin disa zona të Kamenicës, përfshirë Kopërnicën, Kolloleqin, Shipashnicën dhe Kranidellin.
KEDS ka bërë të ditur se punimet lidhen me mirëmbajtjen preventive, eliminimin e defekteve të evidentuara gjatë inspektimit me dron dhe pastrimin e trasesë.
Në Gjakovë, nga ora 10:00 deri në 15:30, ndërprerja do të prekë fshatrat Çifllak, Denjë, Dobidol, Guri Kuq, Kaznik, Kramovik, Polluzhë, Rakovinë dhe një pjesë të Ratkocit.
Arsyeja e punimeve është pastrimi i trasesë.
Ndërprerje të ngjashme janë planifikuar edhe në Pejë, ku nga ora 10:00 deri në 15:30 do të preken Pograxh, Qupev, Jellovci, Resniku dhe Jashanica, si pasojë e punimeve të mirëmbajtjes preventive dhe ndërhyrjeve për eliminimin e defekteve.
Në Mitrovicë, pa furnizim me energji nga ora 10:00 deri në 15:30 do të mbesin fshatrat Druar dhe Mihaliq, ndërsa në Prizren, nga ora 10:00 deri në 15:30, ndërprerja do të prekë Budakovën, Çardakun, Dardhishtën, Dragaqinën, Greiçecin, Mohlanin, Papazin, Reçanin, Staravuçinën dhe Vërshecin.
Në këtë zonë, punimet kanë të bëjnë me ngritjen e shtyllave të tensionit të mesëm në relacionin Çardak–Vërshec.
Ndërprerjet më 28 gusht
Më 28 gusht, KEDS ka planifikuar punime të domosdoshme për sigurinë e sistemit në Ferizaj dhe Pejë, ndërsa në disa zona do të zhvillohen edhe projekte investive.
Në Ferizaj, nga ora 10:00 deri në 15:30, ndërprerja do të prekë zonën e rrugës së Prizrenit, Saraishtën, Lloshkobaren, Llojzën, Kosinën, Slivovën dhe Dremjakun.
Në Pejë, në të njëjtin interval kohor, pa energji do të mbesin Guri i Zi, Mirusha, Separacioni i Boksit, Lagjja Nora dhe Lagjja Foniqi.
Në Gjilan, ndërprerja e planifikuar nga ora 09:00 deri në 16:00 do të prekë disa fshatra dhe biznese në zonën e Vitisë, përfshirë Kabashin, Gërmovën, Sodovinën e Jerlive, Remnikun e Ri, Verbani, Buzovikun, Shushtën, Binqën dhe Debelldehun.
Punimet janë pjesë e një projekti investiv për ngritjen e shtyllës së re dhe zgjerimin e rrjetit.
Ndërprerjet më të gjata më 28 gusht janë planifikuar në Prishtinë, ku disa dalje të rrjetit do të jenë jashtë funksionit nga ora 08:30 deri në 18:00.
Punimet lidhen me konvertimin e rrjetit në 20 kV dhe do të prekin pjesë të rrugëve Tirana, Bill Klinton, Robert Doll, Kosta Novakoviq dhe Garibaldi, si dhe zona të tjera përreth.
Në Gjakovë, nga ora 09:00 deri në 17:00, ndërprerja do të prekë Bellacërkën, Brestocin, Celinën, Hoçën e Vogël, Hoçën e Madhe, Nagavcin, Opterushën dhe Zoçishtën. KEDS ka bërë të ditur se do të ndërrohet ndarësi dhe do të vendosen izolatorë në trafoshtyllë.
Ndërprerjet më 29 gusht
Më 29 gusht, në Pejë, nga ora 13:00 deri në 17:00, do të ndërpritet energjia në disa zona përgjatë daljes Agrokosova.
Ndërprerja do të prekë, ndër të tjera, Fabrikën e Bukës, Rrugën e Hekurudhës, Agrokosovën, Motohia Remont, Deminerët, Kristalin, Pularinë, Koloninë e Sheqeranes dhe zona të tjera.
Sipas KEDS-it, këto punime bëhen nga palë të treta dhe kanë të bëjnë me lidhjen e mufave dhe kyçjen e kabllove në shtyllën elektrike, sipas zgjidhjes teknike.
