Rruga e veturave përfundon në këtë vend.
E nga këtu, pamjet mund të merren vetëm përmes dronëve.
Në këtë formë po monitorohen zjarret në pjesën malore në Bërnicë të Epërme të Prishtinës.
E ka katër ditë që në luftë me zjarret në Bërnicë të Epërme, janë zjarrfikësit e Prishtinës.
“Zjarri ka përfshirë një pjesë të malit dhe kjo është përsëritur që tri herë. Kjo është hera e tretë që ne vijmë me ekipe për shuarjen e këtij zjarri. Zjarri është përsëritur, kanë ardhur ekipe edhe të premten, edhe të shtunën, kanë ardhur e kanë shuar zjarrin, prapëseprapë ose është rindezur në ndonjë mënyrë, ose prapë është shkaktuar zjarr nga faktori njeri”, thotë Mal Gashi, komandant i brigadës së zjarrfikësve në Prishtinë.
Gashi shton se terreni i vështirë bën që zjarri të mos shuhet lehtë.
“Ky zjarr nuk ka përmasa shumë të mëdha, mirëpo terreni është i pakalueshëm me automjete dhe këmbë kanë shkuar ekipet për shuarjen e tij. Sigurisht, kjo merr pak kohë, se është një vijë e zjarrit, të cilën për ta shuar duhet të shkohet hap pas hapi”, shprehet ai.
Por, jo vetëm terreni po e vështirëson punën e zjarrfikësve.
Sfidë për Brigadën e Prishtinës, mbetet edhe numri jo i mjaftueshëm i zjarrfikësve.
“Është numri i zjarrfikësve që nuk është në përputhje me mënyrën dhe rregulloren që përcaktohet. Sipas asaj rregulloreje, pikë referente merret edhe numri i banorëve, e që Prishtina duhet t’i ketë 152 zjarrfikës, e që ne jemi 100, pra na mungon një numër”, thotë Gashi
Ndryshe, njëjtë me Prishtinën, me zjarre fushore e malore, janë përballur edhe qytete të tjera të vendit.
