Një person është plagosur nga arma e zjarrit në rrugën regjionale Sarosh–Rahovec, gjatë orëve të para të së shtunës.
Sipas Policisë së Kosovës, rasti është raportuar më 22 gusht 2026, rreth orës 02:20. Viktima, derisa ishte duke udhëtuar me veturë, dyshohet se është ndalur pasi një automjet i kishte bërë shenjë me drita.
Pas ndalimit, një person dyshohet se ka shtënë me armë në drejtim të viktimës, duke e plagosur në pjesën e pasme të kokës. Më pas, i dyshuari dyshohet se e ka goditur viktimën disa herë me kondakun e armës.
Gjatë përleshjes, viktima ka arritur t’ia marrë armën të dyshuarit dhe është larguar nga vendi i ngjarjes për të kërkuar ndihmë mjekësore.
Policia ka dalë në vendin e ngjarjes dhe ka sekuestruar një pistoletë pa municion.
Viktima është dërguar për trajtim mjekësor, ndërsa rasti po hetohet nga njësitet kompetente në koordinim me prokurorin.
