Deputetja e Partisë Demokratike të Kosovës, Blerta Deliu-Kodra ka reaguar pas vdekjes së dy punëtorëve të Korporatës Energjetike të Kosovës (KEK), të cilët kanë humbur jetën në vendin e punës brenda vetëm tri ditësh.
Ajo ka kërkuar hetim të plotë, serioz dhe të menjëhershëm për të dyja rastet, duke vënë theksin te kushtet e punës, masat e sigurisë dhe përgjegjësia institucionale.
“Siguria e punëtorëve duhet të jetë mbi gjithçka”, ka theksuar ajo.
Ajo u ka shprehur ngushëllime familjeve të viktimave dhe të gjithë të prekurve nga këto raste, duke thënë se përtej ngushëllimeve kërkohet përgjegjësi dhe ndërmarrja e masave konkrete.
Sipas saj, duhet të bëhet gjithçka që tragjedi të tilla të mos përsëriten në vendet e punës.
“Brenda vetëm tri ditësh, dy punëtorë të KEK-ut kanë humbur jetën në vendin e punës. Siguria e punëtorëve duhet të jetë mbi gjithçka. Duhet hetim i plotë, serioz dhe i menjëhershëm për secilin rast, për kushtet e punës, masat e sigurisë dhe përgjegjësinë institucionale.
Ngushëllimet më të sinqerta familjeve të viktimave dhe të gjithë atyre që po përballen me këtë dhimbje. Por përtej ngushëllimeve, sot kërkohet përgjegjësi dhe masa konkrete që tragjedi të tilla të mos përsëriten”, thuhet në reagimin e saj.
