Sot në Kosovë pritet të mbajë mot kryesisht me diell, ndërsa vranësira të pakta parashihen kryesisht rreth zonave malore.
Sipas Institutit Hidrometeorologjik të Kosovës, temperaturat minimale do të lëvizin ndërmjet 9 dhe 13 gradë Celsius, ndërsa maksimalet pritet të arrijnë nga 27 deri në 33 gradë Celsius.
Era do të fryjë nga jugperëndimi dhe verilindja, me shpejtësi prej 1 deri në 6 metra në sekondë.
Kushtet biometeorologjike do të jenë përgjithësisht të mira dhe të favorshme, veçanërisht gjatë orëve të mëngjesit dhe mbrëmjes. Megjithatë, temperaturat e larta gjatë orëve të mesditës mund të shkaktojnë ngarkesë të shtuar termike te personat e ndjeshëm.
Indeksi UV pritet të jetë i lartë deri shumë i lartë, sidomos gjatë intervalit kohor nga ora 10:00 deri në 16:00. Për këtë arsye, rekomandohet shmangia e ekspozimit të drejtpërdrejtë dhe të zgjatur në diell, përdorimi i kapelës, syzeve të diellit dhe kremit mbrojtës, si dhe konsumimi i mjaftueshëm i lëngjeve.
Edhe kushtet agrometeorologjike pritet të jenë përgjithësisht të favorshme për zhvillimin dhe pjekjen e kulturave bujqësore.
