Presidenti i Serbisë, Aleksandar Vuçiq, ka bërë një deklaratë shqetësuese dhe kërcënuese ndaj serbëve në Kosovë, duke e paraqitur ekzistencën e komunitetit serb si të kushtëzuar nga mbështetja për Listën Serbe, subjektin politik të mbështetur nga Beogradi.
Kësisoj, ai ka kërcënuar pluralizmin politik të serbëve në Kosovë.
“Ditën kur të mos kemi më Listën Serbe, nuk do të ketë më as serbë në Kosovë. Do të mbeten Rašiqi dhe shërbëtorët e tij”, deklaroi Vuçiq, shkruan kossev, transmeton KosovaPress.
Deklarata, e cila tingëllon si një mesazh ultimativ, nuk lë hapësirë për një koncept pluralist të përfaqësimit politik të serbëve në Kosovë. Përmes saj, Vuçiq e vendos Listën Serbe si të vetmen alternativë që, sipas tij, mund të garantojë ekzistencën dhe përfaqësimin e serbëve, ndërsa serbët që zgjedhin subjekte të tjera politike i paraqet si të parëndësishëm ose si njerëz që veprojnë kundër interesave të komunitetit.
Edhe pse më pas Vuçiq u përpoq ta zbusë deklaratën duke thënë se me “Listën Serbe” nuk nënkupton vetëm një organizatë politike, por “dikë që përfaqëson Beogradin dhe Serbinë” dhe “popullin serb në tërësi”, formulimi i tij i parë mbetet i drejtpërdrejtë: pa Listën Serbe, sipas tij, nuk do të kishte serbë në Kosovë.
Një qëndrim i tillë sfidon drejtpërdrejt pluralizmin politik brenda komunitetit serb në Kosovë, pasi e vendos përkatësinë politike dhe orientimin ndaj Beogradit si kriter për përcaktimin se kush përfaqëson dhe kush jo serbët.
Në deklaratën e tij, Vuçiq përmendi konkretisht Nenad Rashiqin, duke e cilësuar atë dhe përkrahësit e tij si “shërbëtorë”, duke e bërë edhe më të qartë ndarjen që ai vendos mes serbëve që mbështesin Listën Serbe dhe atyre që kanë zgjedhur një orientim tjetër politik.
Deklarata vjen në një kohë kur përfaqësimi politik i serbëve në Kosovë është çështje që doskutohet nga Beogradi, ndërsa Lista Serbe prej vitesh ka qenë subjekti kryesor politik i mbështetur nga Beogradi.
Në këtë aspekt, mesazhi i Vuçiqit mund të lexohet jo vetëm si deklaratë politike, por edhe si presion ndaj serbëve në Kosovë për të mos u distancuar nga Lista Serbe, duke krijuar përshtypjen se çdo alternativë tjetër politike rrezikon të konsiderohet si kundër interesave të komunitetit serb.
Përveç kësaj, Vuçiq vazhdoi me akuzat ndaj kryeministrit të Kosovës, Albin Kurti, duke e cilësuar situatën e serbëve si “terror” dhe duke akuzuar vendet perëndimore se po e mbështesin Kosovën.
Ai foli edhe për urën kryesore mbi Ibër dhe tha se do t’u dërgojë letra përfaqësuesve ndërkombëtarë, përfshirë sekretarin e përgjithshëm të NATO-s, Mark Rutte.
Vuçiq foli edhe për prodhimin për ushtrinë dhe policinë serbe
