Me anije, përmes Liqenit të Radoniqit, është rruga për të arritur deri në një zonë të fshatit Raskoc të Gjakovës.
Këtu po zhvillohet një aksion nga Inspektorati Mjedisor i Kosovës. (Pamje tu ardh kamionat bageri)
Pesë vila, të cilat ishin ndërtuar në vitin 2019, po rrënohen.
Sipas institucioneve, këto objekte janë ndërtuar pa leje dhe gjenden në pronë publike.
Ministrja në detyrë e Mjedisit, Fitore Pacolli, thekson se janë të vendosur që pronat publike t’i lirojnë nga uzurpimet.
“Arsyeja e këtij aktiviteti është që t’i largojmë këto ndërtime ilegale, të cilat janë ndërtuar në pronë të ndërmarrjes KRU Radoniqi. T’i largojmë prej kësaj zone, e cila nuk është pronë private, u shpreh Pacolli.
Ajo ka paralajmëruar se aksione të tilla do të vazhdojnë edhe në zona të tjera të Kosovës.
“Prioritet i joni janë pronat ujore, sidomos pronat që janë afër liqeneve akumuluese ku furnizohemi me ujë të pijshëm. Pra, ne do të shohim kudo edhe në liqenet e tjera, te Liqeni i Batllavës, Badovcit, ku do që ka prona ujore të uzurpuara” , tha ministrja në detyrë.
Kësisoj, kryeshefi ekzekutiv i KRU Gjakova, Hasan Krasniqi, thotë se pronarët janë njoftuar tash e dy javë për rrënimin e vilave.
“Prej pamundësive teknike të kompanisë, këto kanë mbetur vite me radhë të parrënuara. Nga këtu, kështu që me vendimin e ministrisë, kompania e mirëpret dhe jemi të lumtur që tani këtë zonë e kemi 100% të mbrojtur” , tregoi ai.
Sikurse në Raskoc, rreth një muaj më parë u rrënuan disa vila edhe tek Liqeni i Ujmanit, të ndërtuara gjithashtu në prona publike.
