Deputeti i zgjedhur i Lëvizjes Vetëvendosje, Agim Bahtiri, deklaron se partia e tij është e interesuar që ta formojë qeverinë me Lidhjen Demokratike të Kosovës.
“Ne i kemi ofruar LDK-së pozitën e zëvendës-kryeministrit dhe tri ministri. Ne jemi të interesuar të qeverisim me LDK-në”, tha Agim Bahtiri në emisionin “Këndi i Debatit” në Tëvë1.
Bahtiri u pyet edhe për mundësinë që ta ftojnë në qeveri edhe Partinë Demokratike të Kosovës.
“Ne i kemi ftuar të gjithë, ata e presin 16 shtatorin”, shtoi Bahtiri.
Më 16 shtator merret vendimi për ish-krerët e UÇK-së, Hashim Thaçi, Kadri Veseli, Jakup Krasniqi e Rexhep Selimi që po gjykohen në Hagë.
“Lëvizja Vetëvendosje ishte e gatshme të qeverisë me Lidhjen Demokratike të Kosovës, mirëpo nuk e di se a janë ata të gatshëm. E jona është që ta gjejmë së bashku një president. Ata nuk po japin emra. Kishte shumë takime mes miqve Kurti e Abdixhiku, por nuk u arrit konsensus”, theksoi Agim Bahtiri.
Në pyetjen se pse VV është kundër që të zgjidhet një president partiak, ish-kryetari i Mitrovicës së Jugut tha se në një rast të tillë, presidenti duhet të ishte nga Vetëvendosje.
“Nëse duhet të zgjidhet një president partiak, ai duhet të jetë nga VV pasi ne i kemi fituar zgjedhjet”, pohoi Agim Bahtiri.
