Prokuroria Themelore në Ferizaj ka kërkuar nga Gjykata Themelore në Ferizaj caktimin e masës së paraburgimit ndaj dy personave, D.A. dhe A.A., të dyshuar për veprën penale “Vrasja në tentativë”.
Sipas Prokurorisë, ngjarja ka ndodhur mëngjesin e 13 gushtit 2026, rreth orës 06:10, në një market të pompës së derivateve “Hib Petrol” në Ferizaj.
Nga hetimet fillestare dyshohet se të pandehurit, në bashkëkryerje me një të mitur, kanë sulmuar A.Sh., pas një mosmarrëveshjeje të mëhershme mes njërit prej të dyshuarve dhe të dëmtuarit, e cila kishte ndodhur rreth një vit më parë në Zvicër.
Sipas kërkesës për paraburgim, të dyshuarit fillimisht e kanë përcjellë të dëmtuarin me veturë. Pasi ai ka hyrë në market, ata kanë dalë nga automjeti. Prokuroria dyshon se D.A. e ka goditur të dëmtuarin me thikë në pjesën e majtë të abdomenit, ndërsa A.A. dyshohet se e ka sulmuar me grushte dhe shqelma.
Ndërkohë, i mituri dyshohet se e ka goditur viktimën me një shkop druri në pjesë të ndryshme të trupit.
Pas sulmit, i dëmtuari ka kërkuar ndihmë mjekësore në Qendrën Emergjente në Ferizaj dhe më pas është trajtuar edhe në QKUK në Prishtinë.
Prokuroria ka bërë të ditur se dy të pandehurit, që nga 13 gushti, ndodhen nën masën e ndalimit prej 48 orësh, me vendim të Prokurorit të Shtetit./teve1.info/
