Një person është arrestuar nën dyshimin për kryerjen e veprës penale “Përdorim i armës apo mjetit të rrezikshëm”, gjatë një ahengu në Jabllanicë të Vogël të Pejës.
Sipas njoftimit të Policisë, zyrtarët policorë kanë dalë menjëherë në vendngjarje, ku kanë takuar të dyshuarin.
Gjatë kontrollit, atij i janë sekuestruar një armë e tipit Sarsilmaz, një fishek, dy gëzhoja, dy karikatorë dhe një leje për armën.
I dyshuari është arrestuar dhe pas intervistimit nga hetuesit policorë, me vendim të prokurorit të shtetit është liruar në procedurë të rregullt.
Policia Rajonale në Pejë u ka bërë apel qytetarëve që gjatë ahengjeve dhe festimeve të tjera të përmbahen nga përdorimi i armëve.
“Policia e Kosovës do të ndërmarrë masa ndaj të gjithë atyre që përdorin armë në mënyrë të kundërligjshme”, thuhet në njoftim./teve1.info/
