Kuvendi i Kosovës ka lëshuar një komunikatë për media për zhvillimet e djeshme në Kuvendin e Kosovës.
Sipas Zyrës për Media të këtij institucioni, deputetët e PDK-së dhe AAK-së e kanë ndërprerë për disa minuta vizitën e mërgimtarëve në Kuvend, pasi, sipas tyre, kishin zënë sallën plenare në një kohë kur nuk ishte thirrur asnjë seancë, transmeton KosovaPress.
Tutje, sipas Kuvendit të Kosovës, rreth një mijë bashkatdhetarë nga vende të ndryshme të botës vizituan organin legjislativ në kuadër të aktivitetit të përvitshëm “Bashkatdhetarët në Kuvend”.
“Edhe sot, bashkatdhetarët u pritën nga Kryetarja e Kuvendit të Republikës së Kosovës, U.D. Presidente, Albulena Haxhiu, në ambientet e punës së Kuvendit. Gjatë qëndrimit, ata u pritën gjithashtu nga deputetë dhe zyrtarë të administratës së Kuvendit, të cilët i shoqëruan përgjatë vizitës dhe i informuan më nga afër për punën, funksionimin, përgjegjësitë dhe rolin e Kuvendit si institucioni më i lartë përfaqësues dhe ligjvënës i Republikës së Kosovës. Po ashtu, bashkatdhetarët patën mundësi të njihen drejtpërdrejt me hapësirat e Kuvendit, përfshirë sallën plenare, si dhe me historikun, veprimtarinë dhe rëndësinë e këtij institucioni në jetën demokratike të vendit. Në ditën e tretë, vizita e sallës plenare u ndërpre për disa minuta, pasi deputetë të PDK-së dhe të AAK-së kishin zënë sallën plenare në një kohë kur nuk ishte thirrur asnjë seancë”, thuhet në komunikatë.
Kjo komunikatë u kritikua sot nga deputetë të PDK-së, të cilët thanë që administrata e Kuvendit është instrumentalizuar nga LVV-ja.
Deputetë të PDK-së dhe Aleancës dje qëndruan në Kuvend, ku pati ballafaqime e përplasje me deputetë të LVV-së.
