Qytetarë janë mbledhur edhe mbrëmjen e sotme në sheshin “Skënderbej”, në protestën e 74-t radhazi kundër investimit turistik të planifikuar në Zvërnec dhe me kërkesën për dorëheqjen e kryeministrit Edi Rama.
Protestuesit kanë nisur grumbullimin në shesh, ndërsa gjatë tubimit janë dëgjuar thirrje kundër qeverisë dhe kryeministrit, mes tyre “Jep dorëheqjen!”.
Me pankarta dhe flamuj kombëtarë, protestuesit marshuan përgjatë bulevardit “Dëshmorët e Kombit” në drejtim të Kryeministrisë.
Ndër kërkesat e protestuesve janë shfuqizimi i ndryshimeve në ligjin për zonat e mbrojtura, rishikimi i ligjit zgjedhor, si dhe largimi i asaj që organizatorët e cilësojnë si “kastë e vjetër politike”.
Ashtu si edhe në protestat pararendëse, qytetarë të ndryshëm mbajtën fjalime në foltoren e improvizuar para Kryeministrisë.
Një protestues tha se ka 25 vjet që jeton në Angli dhe akoma nuk ka bërë pushime pasi ka ardhur të protestojë së bashku me familjen.
Sipas tij, në Shqipëri populli nuk ka të ardhura të mjaftueshme ndërsa politikanët kanë miliona.
Një i ri teksa mori fjalën në protestën përpara Kryeministrisë, tha se rinia nuk kërkon privilegje, por një jetë me dinjitet dhe që ta ndërtojë të ardhmen e saj në Shqipëri./Atsh
