Të mërkurën mori rrugë për në zyret e Prokurorisë Speciale.
Aty, ish-deputeti i Lidhjes Demokratike, Gani Geci dorëzoi një kallëzim penal.
Geci, këtë denoncim e paraqiti ndaj kryeministrit në detyrë, Albin Kurti e ushtrueses së detyrës së presidentes, Albulena Haxhiu.
Në të, ai përfshiu edhe të gjithë ministrat në detyrë.
Sipas tij, Kurti bashkë me vartësit e tij, kanë shkelur Kushtetutën.
“E kemi dorëzuar një kallëzim penal ndaj, nuk po di a më i thënë kryeministër se ai është në detyrë që një dy tri vjet, edhe kundër gjithë atyre që janë duke e shkelur Kushtetutën e Republikës së Kosovës. Kushtetuta e Republikës së Kosovës nuk është e imja, nuk është as atyre Kuvendit, aty është e qytetarëve, është e Republikës së Kosovës dhe duhet me u mbrojtë me të gjitha mjetet”, tha Geci.
Ndërsa, Gent Gjini, avokati përfaqësues i Gecit, tha se kallëzimi është i bazuar në prova e fakte, gjersa i bëri thirrje Prokurorisë të vendosë masë të përkohshme.
“E kemi një vendim të Gjykatës Supreme i cili ia ndalon deputetëve ta ushtrojnë postin e ekzekutivit, pasi që kemi parë që një vendim i Ministrit Murati iu është shfuqizuar dhe është shpall i pavlefshëm, tani i bëjmë thirrje Prokurorisë Speciale, sepse me mandat edhe me ligjin mbi kompetencat e prokurorisë, Prokuroria ka të drejtë të vendos masë të përkohshme”, u shpreh Gjini.
Por anipse dorëzoi kallëzim penal ndaj Kurtit, Geci u shpreh i hapur që partia të cilës ai i takon, të bashkëpunojë me Lëvizjen Vetëvendosje.
“Ne kemi thënë që jemi për koalicion dhe ne jemi për koalicion sepse koalicionet ndërtohen duke pasur besim, duke pasur një bashkëpunim, ky njeri nuk dëshiron bashkëpunim me kërkon, pasi kërkon bashkëpunim pastaj thotë se ke me ia bo qysh tham une”, deklaroi Geci.
Mes tjerash, avokati Gjini theksoi se përmes kallëzimit është treguar se përveç keqpërdorimit të detyrës zyrtare, po keqpërdoret edhe paraja publike.
