Gjykata Themelore në Gjakovë ka aprovuar kërkesën e Prokurorisë Themelore dhe ka caktuar nga një muaj paraburgim për tre të dyshuar lidhur me incidentin e 10 gushtit në Gjakovë.
Sipas njoftimit të gjykatës, i dyshuari H.D. dyshohet për veprat penale vrasje në tentativë dhe mbajtje në pronësi, kontroll ose posedim të paautorizuar të armëve, ndërsa A.D. dhe E.G. dyshohen për pjesëmarrje në rrahje.
Sipas Prokurorisë, incidenti ka ndodhur më 10 gusht, rreth orës 15:50, në rrugën “Dëshmorët e Hereçit” në Gjakovë. Pas një mosmarrëveshjeje dhe konflikti fizik, H.D. dyshohet se ka shtënë disa herë me armë në drejtim të D.G., duke e goditur në pjesën e sipërme të këmbës së majtë.
I dëmtuari është dërguar për trajtim në Emergjencën e Spitalit Rajonal “Isa Grezda”, ndërsa i dyshuari, sipas Prokurorisë, është larguar nga vendi i ngjarjes.
Pas seancës dëgjimore, gjyqtari i procedurës paraprake nga Departamenti i Krimeve të Rënda, Samedin Cena, ka vlerësuar se janë plotësuar kushtet ligjore për caktimin e masës së paraburgimit.
Tre të dyshuarit do të qëndrojnë në paraburgim për një muaj, nga 10 gushti deri më 10 shtator 2026./teve1.info/
