Deputetët e Partisë Demokratike të Kosovës janë përplasur me deputetin e Lëvizjes Vetëvendosje, Ardian Gola, gjatë zhvillimeve në Kuvendin e Kosovës.
Gola ka kritikuar qëndrimin e opozitës lidhur me konstituimin e Kuvendit, duke iu referuar edhe deklaratave të mëhershme për formimin e institucioneve.
“Kur e konstituuam Kuvendin herën e kaluar edhe formuam Qeverinë, çka thatë? Thatë se s’ka me u konstitu Kuvendi as me formu Qeveri pa marrëveshje. Tash kur po bëjmë me kriju marrëveshje, po thoni konstituone Kuvendin. Kjo i bjen ‘populli hyp se të vrava, shtryp se e myta’. Ajo kolegia jote gjuan me ujë, po qysh s’i vjen turp?”, ka thënë Gola.
Ndaj tij ka reaguar deputeti i PDK-së, Përparim Gruda, i cili e ka pyetur pse seanca nuk po thirret sikurse vitin e kaluar.
“A e thirre vitin e kaluar seancën çdo 48 orë? Pse s’e thirrni prapë?”, ka deklaruar Gruda.
Gola ka kërkuar që, sipas tij, të eliminohen skenat e tilla në Kuvend.
“Këto skena duhet me i eliminu”, ka thënë Gola.
Gruda i është kundërpërgjigjur duke thënë se këto situata janë sjellë në Kuvend nga Vetëvendosje.
“Këto skena në Kuvend i keni pru ju”, ka deklaruar Gruda.
Deputeti i VV-së, Ardian Gola, i është drejtuar deputetes së PDK-së, Ganimete Musliut, duke thënë se në komunikimet private ajo nuk kursen fjalët e mira ndaj tij, ndërsa në Kuvend, sipas tij, po krijon drama.
“Ju duhet fillimisht me e ndërtu argumentin, ju s’keni argument. Masì e kemi shkel Kushtetutën, pse s’po e çoni në Gjykatë Kushtetuese? Çoje more, po çoje. A t’ka mbet ujë mo a jo? Ti në komunikime private nuk ka fjalë të mirë bote që nuk ma thu, e del këtu bon drama mu edhe godet kolegun tonë parlamentar. Kjo tregon pafytyrësinë e juve”, i ka thënë Gola deputetes së PDK-së, Ganimete Musliut.
Përplasje tjera ka pasur edhe mes deputëve tjerë të PDK-së dhe Aleancës në njërën anë me ata të LVV-së në anën tjetër. Deputetët e PDK-së dhe të Aleancës janë mbledhur sot në kuvend ku kanë kërkuar thirrjen e saeancës për konstituimin e kuvendit.
