Ministri në detyrë i Financave, Hekuran Murati, ka kritikuar deputetët e opozitës lidhur me qëndrimin e tyre për procesin e konstituimit të Kuvendit dhe votimin për Presidentin e Kosovës.
Përmes një reagimi, Murati ka ngritur pyetjen nëse deputetët opozitarë do të qëndrojnë në sallë gjatë votimit për Presidentin, duke thënë se pikërisht kjo është çështja kryesore.
“A qëndrojnë deputetët e opozitës në sallë kur të votohet për President? Kjo është çështja”, ka shkruar Murati.
Sipas tij, opozita në njërën anë kërkon konstituimin e Kuvendit, ndërsa në anën tjetër deklaron se nuk do të qëndrojë në sallë gjatë votimit për Presidentin.
Murati ka vlerësuar se një qëndrim i tillë mund ta çojë vendin drejt zgjedhjeve të reja.
“Me fjalë tjera, po duan ta dërgojnë vendin edhe njëherë në zgjedhje”, ka deklaruar ai.
Tutje, Murati ka theksuar se Kosova ka nevojë për institucione stabile dhe ka kritikuar mundësinë e përsëritjes së zgjedhjeve.
“Kosova nuk ua ka borxh opozitës që të përsërisë zgjedhje të panevojshme aq herë derisa opozita të jetë e kënaqur me rezultatin”, ka shkruar Murati./teve1.info/
