Inspektorati Policor i Kosovës ka nisur hetim preliminar sipas detyrës zyrtare, lidhur me pretendimet për tejkalim të autorizimeve policore ndaj disa pjesëtarëve të Policisë së Kosovës.
Sipas IPK-së, hetimi është iniciuar bazuar në raportimet e mediave dhe deklaratat publike të 11 gushtit 2026, lidhur me pretendimet e qytetarit me inicialet N. R. për veprime të kundërligjshme nga zyrtarë policorë gjatë një operacioni në Dren të Zubin Potokut.
Qëllimi i hetimit paraprak është verifikimi i pretendimeve dhe sqarimi i plotë i rrethanave që lidhen me veprimet e policisë gjatë operacionit.
IPK ka bërë të ditur se, pa paragjykuar rezultatin e hetimit, do të mbledhë dhe vlerësojë të gjitha informacionet dhe provat në dispozicion, në përputhje me mandatin e tij ligjor.
Në kuadër të hetimeve, Inspektorati pritet të sigurojë dokumentacion dhe informacione zyrtare, të bashkëpunojë me institucionet përkatëse dhe të intervistojë personat që mund të kenë dijeni për rastin.
IPK ka theksuar se çdo ankesë apo informacion që lidhet me sjelljen e zyrtarëve policorë trajtohet me seriozitetin më të lartë.
