Pesë persona janë arrestuar pas një përleshjeje fizike që ka ndodhur gjatë natës në rrugën “12 Qershori” në Ferizaj, në afërsi të dy lokaleve.
Policia është njoftuar për rastin rreth orës 00:15, ndërsa njësitet reaguese dhe hetuesit kanë dalë menjëherë në vendin e ngjarjes.
Si pasojë e përleshjes, tre persona kanë pësuar lëndime trupore.
Njëri prej tyre, për shkak të natyrës së lëndimeve, pas trajtimit fillestar në Qendrën Emergjente në Ferizaj është dërguar për trajtim të mëtejmë në QKUK në Prishtinë.
Policia ka bërë të ditur se tre persona janë arrestuar në orët e hershme të mëngjesit, ndërsa gjatë ditës janë arrestuar edhe dy persona të tjerë, të dyshuar për përfshirje në rast.
Sipas hetimeve, njëri nga të dyshuarit ka pranuar se gjatë përleshjes kishte përdorur një kaçavidë, me të cilën dyshohet se ka goditur njërin nga personat e lënduar.
Policia ka sekuestruar kaçavidën si provë materiale, ndërsa ka siguruar edhe një incizim të ngjarjes, i cili do t’i dorëzohet Prokurorisë Themelore.
Të arrestuarit janë: D.A., 21 vjeç; E.A., 22 vjeç; A.N., 39 vjeç; O.A., 18 vjeç dhe A.A., 22 vjeç.
Personi i lënduar, SH.A., 33 vjeç, i cili po merr trajtim në QKUK, pritet të intervistohet nga hetuesit pas stabilizimit të gjendjes shëndetësore.
Me rastin është njoftuar prokurori i shtetit, i cili ka udhëzuar inicimin e rastit për veprat penale “Vrasje e mbetur në tentativë” dhe “Pjesëmarrje në rrahje”.
Me vendim të prokurorit, pesë të dyshuarit janë ndaluar për 48 orë.
“Hetuesit policorë janë duke i zgjeruar hetimet me qëllim të identifikimit dhe përfshirjes së personave të tjerë të mundshëm që mund të kenë qenë të përfshirë në këtë rast”, theksohet në fund të njoftimit./teve1.info/
