Kryetari i Partisë Demokratike të Kosovës, Bedri Hamza ka thënë se Kosova ndodhet përballë një krize të thellë kushtetuese dhe institucionale, që sipas tij, kjo situatë nuk mund të trajtohet më si një mosmarrëveshje e zakonshme politike.
Ai ka thënë se kjo po ndodh për shkak të Lëvizjes Vetëvendosje për moskonstituim të Kuvendit.
Hmza në mbledhjen e Kryesisë së PDK-së e mbajtur të hënën ka thënë se Vetëvendosje po shkatërron themelet e institucioneve të shtetit.
“Vetëvendosja është shndërruar në shkatërruese të themeleve institucionale të shtetit. Kur shpërfillen Kushtetuta, aktgjykimet e Gjykatës Kushtetuese, Rregullorja e Kuvendit dhe afatet detyruese, nuk kemi më të bëjmë me një mosmarrëveshje të zakonshme politike. Po goditet vetë rendi mbi të cilin qëndron shteti ynë”, ka deklaruar Hamza, thuhet në komunikatën e PDK-së.
PDK-ja ka paralajmëruar veprime ligjore, politike dhe demokratike, siç thuhet me qëllim kundërshtimin e degradimit të mëtejshëm të institucioneve dhe mbrojtjen e rendit kushtetues.
“Këto veprime do të shoqërohen edhe me konsultime dhe koordinim me subjektet politike, institucionet dhe organizatat e shoqërisë civile, që besojnë se shteti dhe Kushtetuta janë mbi çdo parti dhe mbi çdo individ. Partia Demokratike e Kosovës, si parti shtet-formuese, e konsideron përgjegjësi politike dhe qytetare që të reagojë ndaj çdo përpjekjeje për normalizimin e shkeljes së rregullave kushtetuese dhe institucionale”, thuhet në komunikatë./teve.info/
