Lidhja e Bizneseve të Kosovës i ka reaguar ministrit në detyrë të bujqësisë,Armend Muja, që të ndaloj me pompozitetin që dëmton prodhuesit vendor.
Në një reagim në rrjetin social në “Facebook”, ata thanë se nuk janë kundër kontrollit por kundër mënyrës së komunikimit që krijon perceptimin se prodhuesi vendorë është i pasigurt.
“Si Lidhje e Bizneseve të Kosovës, dua të jemi shumë të qartë: nuk jemi kundër kontrollit, inspektimit apo trajtimit profesional të produkteve, veçanërisht të produkteve ushqimore. Përkundrazi, siguria e konsumatorit dhe cilësia e produkteve duhet të jenë prioritet i përbashkët i të gjithëve.Por jemi kundër pompozitetit, deklarimeve politike dhe mënyrës së komunikimit që krijon një perceptim sikur prodhimi vendor në Kosovë është i pasigurt dhe se prodhuesit tanë duhet të trajtohen si problem”, thuhet në reagimin e tyre.
Po ashtu, ata thanë se është krijuar një klimë e panevojshme dyshimi ndaj prodhimit vendor.
“Sot është krijuar një klimë e panevojshme dyshimi ndaj prodhimit vendor. Në vend që të ndërtojmë besim te produktet tona, po krijohet përshtypja se, në çdo situatë, fokusi është tek nxjerrja e prodhuesit vendor në një pozicion mbrojtës.Ministër, çështjet profesionale, laboratorike dhe rezultatet e analizave duhet të flasin përmes institucioneve kompetente, laboratorëve dhe raporteve zyrtare – jo përmes pompozitetit politik”, thonë tutje ata.
Në fund të reagimit të tyre Lidhja e Bizneseve të Kosovës janë shprehur se ata janë të gatshëm bashkëpunojnë në çdo proves profesional.
Ky reagim vije pas publikimit të rezultateve lidhur me qumështoren “Vita”, sipas disa rezultateve të paraqitura të ministrit të bujqësisë, Armend Muja, është gjetur prani e vajit të palmës.
Ndërsa, Qumështorja “Vita”, pasi prezantoi disa analiza të marra nga Agjencia e Ushqimit dhe Veterinarisë që dëshmojnë se qumështi i kësaj kompanie është i pastër, i ka nisur procedurat ligjore kundër AUV-it dhe Ministrisë së Bujqësisë, Pylltarisë dhe Zhvillimit Rural.
Qumështorja e ka paditur ministrinë edhe në Gjykatën Administrative, duke kërkuar shfuqizimin e vendimit për inicimin e verifikimit administrativ dhe kontrollit të jashtëzakonshëm ndaj operatorit
ekonomik ABRAZEN LLC, si edhe ndaj operatorëve të tjerë ekonomikë që gjatë procedurës rezultojnë të lidhur me objetin e këtij verfikimi.
