Ministri në detyrë i Punëve të Brendshme, Xhelal Sveçla, ka nxjerrë vendim për ndalimin e përhershëm të hyrjes, transitit dhe qëndrimit në territorin e Kosovës për shtetasin e Serbisë, Vladimir Luçiq.
Vendimi, i nënshkruar më 7 gusht 2026, bazohet në Ligjin për të Huajt dhe në dispozitat ligjore që i japin ministrit kompetencë për të ndaluar hyrjen e një shtetasi të huaj për arsye të sigurisë shtetërore, rendit publik dhe mbrojtjes së rendit kushtetues.
Në arsyetimin e vendimit thuhet se Luçiq, përmes deklaratave të tij publike, ka shfaqur qëndrime që, sipas Ministrisë së Punëve të Brendshme, cenojnë drejtpërdrejt sovranitetin, integritetin territorial dhe rendin kushtetues të Republikës së Kosovës.
Sipas vendimit, ai ka promovuar dhe mbështetur publikisht veprimtari dhe politika që sfidojnë kompetencat sovrane të institucioneve të Kosovës në sektorë strategjikë, përfshirë komunikimet elektronike dhe infrastrukturën telekomunikuese.
MPB-ja vlerëson se deklaratat e Luçiqit përbëjnë propagandë kundër sovranitetit të Kosovës dhe rendit kushtetues, ndërsa, bazuar në Ligjin për të Huajt, ato konsiderohen edhe kërcënim për vendin përmes nxitjes së gjuhës së urrejtjes dhe destabilizimit.
“Prandaj, për shkak të interesave të shtetit, të sigurimit të rendit kushtetues e juridik, si dhe të sigurisë shtetërore e rendit publik, masa e ndalimit të hyrjes në Republikën e Kosovës duhet të jetë e përhershme”, thuhet në arsyetimin e vendimit.
Me vendim obligohen Policia e Kosovës dhe institucionet e tjera përgjegjëse që ta zbatojnë këtë masë.
Vendimi ka hyrë në fuqi në ditën e nënshkrimit.
Kujtojmë se Vladimir Luçiq është drejtor i Telekom Srbija, ndaj vendimi lidhet edhe me deklaratat e tij publike për çështje që kanë të bëjnë me sektorin e telekomunikacionit.
