Deputeti i zgjedhur nga Lidhja Demokratike e Kosovës, Arben Gashi ka thënë se duhet të konstituohet Kuvendi e më pas të vazhdohet me bisedimet politike, në bazë të afateve kushtetuese për formimin e Qeverisë dhe zgjedhjen e Presidentit.
Gashi ka thënë se Kosova nuk duhet të hyjë në vakum institucional, e krijohen precedent që afatet kushtetuese mund të shtyhen pa fund.
“Rruga është e qartë: ta zgjedhim Kryetarin e Kuvendit dhe ta konstituojmë institucionin më të lartë përfaqësues të vendit. Më pas, bisedimet politike le të vazhdojnë, ashtu siç e parasheh Kushtetuta – me afatet për formimin e Qeverisë dhe, në kohën e duhur, për zgjedhjen e Presidentit. Shteti nuk ndërtohet duke zvarritur vendimet, por duke respektuar Kushtetutën. Sot kërkohet përgjegjësi, maturi dhe vendimmarrje. Kosova nuk ka nevojë për kriza të reja, por për institucione funksionale dhe lidership që e vendos interesin e Republikës mbi çdo interes tjetër”, ka shkruar Gashi në Facebook.
Konstituimi i Kuvendi nuk u bë të enjten, pas LVV nuk propozoi kandidat për kryetar të Kuvendit.
Kryeministri në detyrë, Albin Kurti njëherit kryetar i LVV-së tha se u duhet kohë për të arritur një marrëveshje me partitë tjera politike për presidentin.
Ai tha se konstituimi i Kuvendit dhe formimi i Qeverisë, pa një marrëveshje për presidentin rrezikon shkuarjen në zgjedhje të reja./teve1.info/
