Disa muaj pasi kishte shpallur pavarësinë, Mali i Zi e njohu Kosovën si shtet të pavarur.
Por 18 vite pas, disa komuna në shtetin fqinj kanë vendosur ta “ç’njohin” pavarësinë e vendit.
Nisma kundër pavarësisë së Kosovës nisi qysh në maj të këtij viti.
E para komunë që miratoi vendimin ishte ajo e Zetës.
E pas saj, ditë më parë, edhe komuna e Plevlës doli me vendim të njëjtë.
Por një gjë të tillë po e kundërshtojnë nga Ministria e Punëve të Jashtme e Malit të Zi.
Në një përgjigje për tëvë1, nga kjo Ministri thanë se Komunat nuk kanë kompetenca të tilla diplomatike.
“Lidhur me vendimet e miratuara nga disa kuvende komunale në lidhje me njohjen e Republikës së Kosovës, dëshirojmë të nënvizojmë se njësitë e vetëqeverisjes lokale nuk kanë as kompetencë kushtetuese dhe as ligjore në fushën e politikës së jashtme, dhe as nuk janë të autorizuara të miratojnë akte që prodhojnë ndonjë efekt sipas ligjit ndërkombëtar. Vendimet e miratuara nga kuvendet komunale nuk mund të ndikojnë në pozicionin ndërkombëtar të Malit të Zi, të ndryshojnë detyrimet e tij ndërkombëtare ose të ndryshojnë politikën e jashtme të vendosur të shtetit”, thuhet nga Ministria e Jashtme e Malit të Zi.
Madje në përgjigje thuhet se Mali Zi do të vazhdojë ta mbështesë pjesëmarrjen dhe anëtarësimin e Kosovës në organizata dhe nisma ndërkombëtare e rajonale.
Por cilat janë arsyet që dërguan që këto komuna të marrin këto vendime?
“Aty siç dihet dominojnë partitë pro serbe dhe partitë pro ruse të cilët në këtë formë tentojnë që të animojnë elektoratin e vet, sepse së shpejti në Mal të Zi, do të zhvillohen zgjedhjet jo vetëm për pushtetin vendor, por edhe për pushtetin qendror dhe kuptohet që kjo është një lojë politike, e cila mundohet që elektoratin serb ta bëjë për vete dhe duke luajtur me mitin e Kosovës tentojnë të jenë në pushtet dhe dominojnë në skenën politike”, vlerëson Ali Salaj -analist
Madje sipas analistit politik në Mal të Zi, edhe dy komuna të tjera kanë pasur në plan ta bëjnë një veprim të tillë.
“Në plan ka qenë që edhe Hercignovi dhe Tivati, dy qytete bregdetare të cilat janë afër Bosnjës dhe kanë pasur për qëllim edhe ata bëjnë një gjë të tillë dhe siç duket vërejtja e Bashkimit Evropian ka ndikuar që ata të ndalen dhe të mendojnë se a duhet të vazhdojnë tutje”, thotë Salaj.
Nga Ministria e Punëve të Jashtme e Malit të Zi kanë kërkuar nga të gjithë mbajtësit e funksioneve publike që të respektojnë rendin kushtetues dhe të mos krijojnë tensione të panevojshme politike.
