Një grua rreth 30-vjeçare është shpëtuar të martën mbrëma nga një situatë e rrezikshme në afërsi të Fushës së Pajtimit në Kaçanik, falë reagimit të shpejtë të Policisë së Kosovës, zjarrfikësve dhe ekipeve emergjente.
Sipas njoftimit të Drejtorisë Rajonale të Policisë në Ferizaj, rasti është raportuar rreth orës 18:20, pasi një njësi e Trafikut Rajonal, gjatë patrullimit në rrugën magjistrale, kishte vërejtur gruan duke ecur në pjesën e betonuar të urës, në rrethana që sic thuhet, ngritën dyshime për rrezik të mundshëm ndaj jetës së saj.
Pas pranimit të informatës, në vendin e ngjarjes kanë dalë patrullat policore, Njësia e Hetimeve, Njësia e Zjarrfikësve dhe ekipi i Emergjencës.
Forca te rendit thanë se falë reagimit të koordinuar ndërinstitucional, rreth orës 18:35 gruaja është larguar me sukses nga zona e rrezikshme dhe është dërguar në një vend të sigurt pranë rrethrrotullimit te Fusha e Pajtimit.
Në njoftim thuhet se ekipi i Emergjencës i ka ofruar ndihmën e nevojshme mjekësore, ndërsa për rastin janë njoftuar prokurori i shtetit dhe Qendra për Punë Sociale, pasi personi nuk kishte familjarë apo persona përgjegjës që të kujdeseshin për të.
Policia e Kaçanikut bëri të ditur se, në bashkëpunim me institucionet përkatëse, ka ndërmarrë të gjitha veprimet e nevojshme për trajtimin e rastit dhe strehimin e personit.
