Deputeti i VV-së, Vigan Qorrolli, në emisionin “Info Nata” në Tëvë1, ka komentuar takimet e thirrura nga kryeministri në detyrë, Albin Kurti, me përfaqësuesit e partive politike, para vazhdimit të seancës për konstituimin e Kuvendit të Kosovës.
Duke folur për refuzimin e Partisë Demokratike të Kosovës dhe Aleancës për të marrë pjesë në takim, Qorrolli tha se PDK është në opozitë si rezultat i vullnetit të qytetarëve dhe jo për shkak të një zgjedhjeje të saj.
“Në opozitë e ka lënë populli, por ajo çka ka thënë nënkryetarja e PDK-së është e vërteta që fshihet pas kësaj letre. Ajo në konferencën për shtyp në ambientet e Kuvendit të Kosovës ka thënë se ne nuk marrim pjesë dhe maskimi pas stigmës së të qëndruarit në opozitë është fakti që nuk duan ta lejojnë Albin Kurtin të qeverisë. Është shumë legjitime që të qëndrojnë në opozitë, por nuk është legjitime kur në situatën e zgjedhjes së presidentit kërkohen dy të tretat e deputetëve dhe konsensusi për të qëndruar në sallë”, ka thënë Qorrolli.
Ai shtoi se refuzimi për të marrë pjesë në takim përbën, sipas tij, një sabotim të procesit të themelimit të institucioneve të reja.
“Refuzimi i tyre është sabotim i pastër i themelimit të institucioneve të Republikës së Kosovës, përfshirë pozitën e presidentit, sepse nuk parashihet asnjë rezultat kur tentohet krijimi i institucioneve”, ka deklaruar Qorrolli.
