Përgatitjet për tu zhvendosur i kishin nisur tash e disa muaj.
Për këtë, nga muaji shkurt, familja Berisha filluan ta pastrojnë shtëpinë e tyre në komunën e Zveçanit.
Kjo pronë në veriun e Kosovës, kësaj familjeje, iu rikthye pas plot 28-vjetësh.
Por në komunën e banuar me shumicë serbe, këtë fakt duket se nuk e pritën mirë të gjithë.
Kjo meqë në orët e para të mëngjesit të së hënës, kësaj shtëpie dikush ia vuri flakën.
E si ndodhi e gjithë ngjarja ka treguar Zana Berisha e cila një pjesë të fëmijërisë së saj e kishte kaluar në hapësirat e kësaj shtëpie.
“Sulmi ka ndodhë rreth orës 01:00 pas mesnate, natën e kaluar diku deri në orën 8:30 familja kemi qenë këtu, pastaj sot në mëngjese më kanë kontaktu prej Policisë që shtëpia është djegë një pjesë dhe fatmirësisht pjesa më e madhe ka shpëtuar. Por një pjesë është dëmtua goxha. Momentalisht Policia është duke i kryer të gjitha hetimet të shohim”, u shpreh Berisha.
E kjo ngjarje, sipas Zanës, nuk do ta ndal kthimin e familjes në pronën e tyre.
“Meqë historia jonë është bërë publike, meqë thirrja jem është bërë publike lidhje me kthimin e shqiptarëve në këtë pjesë veriore dikujt kjo nuk i konvenon. Po kjo nuk do të thotë se ne kemi më u zbrazë. Ky sulm na forcon bindjen që në jemi në rrugën e drejt. Nuk po kërkojmë më shumë se aq sa na takon. Jemi kthy në shtëpinë tonë, në pronën tonë. Ky sulm qyqar neve nuk na ndalon”, u shpreh tutje Berisha.
Për fatin e mirë, zjarri nuk e përfshiu edhe pjesën tjetër të shtëpisë.
Ndërsa në vendngjarje dolën menjëherë edhe organet e rendit.
“Mbrëmë pas mesnate e kemi pranuar një informacion që një shtëpi në Zveçan është duke u djegur. Kemi dal në vend të ngjarjes dhe kemi parë që një pjesë e kulmit është dëmtuar dhe një dhome i ishte vëne zjarri. Shenja të zjarrvënës kemi parë. Dëmtimet nuk mund të jenë shumë të mëdha pasi shtëpia është e pabanuar. Sidoqoftë Policia është duke u marrë më këtë rast”, ka thwnw Elshani.
Ndryshe, sipas policisë për momentin nuk ka ndonjë person të dyshuar për këtë rast.
