Aleanca për Ardhmërinë e Kosovës ka refuzuar ftesën e kryeministrit në detyrë dhe kryetarit të Lëvizjes Vetëvendosje, Albin Kurti, për një takim lidhur me themelimin e institucioneve.
Në letrën drejtuar Kurtit, kryetari i Aleancës, Ardian Gjini, rikujton se Aleanca e kishte sqaruar qëndrimin e saj që në letrën e 9 korrikut 2026.
“Aty ju kemi bërë të ditur se nuk kemi kurrfarë interesi që të jemi pjesë e Qeverisë së Kosovës, në asnjë format. Po ashtu, e kemi ofruar mundësinë e ndihmesës për themelimin e institucioneve dhe evitimin e zgjedhjeve të reja, duke pasur parasysh pikërisht zgjedhjen e Presidentit të Kosovës. Ne kemi vendosur gjashtë pika që besojmë se janë interes jetik për Kosovën dhe qytetarët e saj, ndërkohë nuk e kemi marrë asnjë përgjigje direkte ose indirekte për to”, thuhet në letër.
Sipas Gjinit, gjashtë kërkesat e AAK-së përfshijnë pranimin e projektit të gazit amerikan si prioritet strategjik, ndërtimin e një termocentrali të ri me thëngjill, ngritjen e pragut të TVSH-së nga 30 mijë në 100 mijë euro, lirimin e tokës së punuar nga tatimi në pronë, financimin e projekteve infrastrukturore të mbetura pezull dhe krijimin e një fondi emergjent prej 800 milionë deri në 1 miliard euro për investime kapitale në Prishtinë.
Në fund të letrës, Gjini thekson se AAK nuk sheh arsye për të marrë pjesë në takimin e thirrur nga Kurti.
“Prandaj, Aleanca nuk sheh fare arsye që të takohemi në këtë format”, përfundon letra.
