Policia e Kosovës ka gjobitur me nga 500 euro dy persona në komunën e Klinës, pasi dyshohet se kanë djegur hamulloret pas korrjes së grurit, duke rrezikuar përhapjen e zjarrit dhe sigurinë e qytetarëve.
Sipas njoftimit të Policisë, rasti i parë është regjistruar më 30 korrik, rreth orës 11:00, në fshatin Caravik, ku pas raportimit për zjarr, në vendin e ngjarjes kanë dalë njësitet policore dhe zjarrfikësit.
Gjatë veprimeve hetimore, pronari i parcelës ka pranuar se kishte ndezur zjarr për të djegur hamulloret pas korrjes së grurit.
“Me urdhër të prokurorit, rasti është evidentuar me shënim zyrtar, ndërsa ndaj personit është shqiptuar gjobë në vlerë prej 500 eurosh”, thuhet në njoftimin e Policisë.
Rasti i dytë ka ndodhur po të njëjtën ditë, rreth orës 15:25, në fshatin Dollc, ku zjarri kishte përfshirë një sipërfaqe prej rreth 2 deri në 3 hektarë tokë bujqësore.
Policia bëri të ditur se në vendin e ngjarjes janë hasur edhe tre traktorë duke punuar në arë, ndërsa pronari i tokës ka deklaruar se kishte ndezur zjarrin për pastrimin e pronës së tij.
“Me udhëzim të prokurores kujdestare, rasti është evidentuar me shënim zyrtar dhe ndaj kundërvajtësit është shqiptuar gjobë prej 500 eurosh”, njofton Policia.
Policia e Kosovës ka bërë të ditur se do të vazhdojë të ndërmarrë masa ligjore ndaj të gjithë personave që, përmes veprimeve të papërgjegjshme, rrezikojnë jetën e qytetarëve, pronën dhe mjedisin.
Njëkohësisht, autoritetet u kanë bërë thirrje qytetarëve që të shmangin ndezjen e zjarreve në natyrë dhe të tregojnë kujdes maksimal gjatë aktiviteteve që mund të shkaktojnë përhapjen e flakëve.
“Policia e Kosovës apelon që qytetarët të jenë të kujdesshëm dhe të shmangin çdo veprim që mund të shkaktojë zjarre, si ndezja e hamulloreve, përdorimi i pakujdesshëm i shkrepëseve, cigareve apo zjarreve në hapësira të hapura”, thuhet në njoftim.
