Publicisti Kim Mehmeti ka komentuar krizën politike dhe bllokadën institucionale në Kosovë, duke thënë se Lëvizjes Vetëvendosje i ka mbetur vetëm një rrugë për të dalë nga situata aktuale.
Në emisionin “Këndi i Kimit” në Tëvë1, Mehmeti tha se, pas refuzimit të partive opozitare për bashkëpunim me LVV-në, kjo e fundit duhet të tërhiqet nga përpjekjet për formimin e institucioneve dhe t’ia lërë këtë përgjegjësi opozitës.
“Mendoj se LVV-së i ka mbetur vetëm edhe një zgjidhje, që të thotë: ‘Ne nuk duam as qeveri e as president, urdhëroni, bëni ju’. Prapë kjo nuk i bën mirë Kosovës, por u bën mirë disa tipave që kanë vendosur të mendojnë se ose ata, ose askush. Ata mendojnë se duhet t’i thonë këtij populli se po gabon dhe se vetëm ata janë të mirë”, ka deklaruar Mehmeti.
Sipas tij, Vetëvendosje duhet të heqë dorë nga përpjekjet për krijimin e institucioneve dhe të mbështesë një qeveri të formuar nga opozita, në mënyrë që, sipas tij, të dëshmohet se kush mban përgjegjësi për situatën politike në vend.
“Unë them se tash e vetmja që i ka mbetur VV-së është të thotë: ‘Mirë, ne tërhiqemi. Meqë ju jeni të pakënaqur, ne nuk duam as qeveri. Bëjeni ju, ne do t’ju votojmë’. Le të heqë dorë nga vota e popullit, sepse kështu do të kënaqeshin këta të opozitës. Por unë besoj se, nëse vazhdojnë në këtë rrugë, ata nuk do t’i fitojnë zgjedhjet as pas 100 vjetësh”, ka thënë Mehmeti.
