Një person ka humbur jetën dhe një tjetër ka pësuar lëndime trupore si pasojë e rrëzimit të një krani në një vendpunishte në rrugën “A” në Prishtinë.
Policia e Kryeqytetit ka konfirmuar rastin përmes zëdhënësit Enis Pllana, i cili ka bërë të ditur se dy personat e përfshirë kanë pranuar tretman mjekësor.
“Njësitet policore kanë dalë në vendin e ngjarjes dhe kanë ndërmarrë veprimet e nevojshme. Aktualisht, njësitet relevante në koordinim me Prokurorin e Shtetit kanë filluar hetimet për sqarimin e rrethanave të rastit”, ka deklaruar Pllana.
Më pas, zëdhënësi i Policisë ka dhënë detaje të tjera lidhur me epilogun e rastit, duke bërë të ditur se njëri nga të lënduarit nuk ka arritur t’u mbijetojë plagëve.
“Lidhur me rastin në fjalë, ju njoftojmë se dy persona kanë pësuar lëndime trupore dhe janë dërguar për trajtim mjekësor. Si pasojë e lëndimeve, njëri nga ta nuk ka arritur t’u mbijetojë plagëve dhe ka ndërruar jetë. Vdekja e tij është konstatuar nga ekipa mjekësore në QKUK”, ka thënë Pllana.
Sipas Policisë, njësitet relevante policore, në koordinim me Prokurorin e Shtetit, kanë nisur hetimet për zbardhjen e plotë të rrethanave që çuan në këtë rast.
