Ministri në detyrë i Rinisë dhe Sportit, Blerim Gashani, e ka cilësuar si një moment historik për sportin e Kosovës nënshkrimin e Deklaratës së Synimit për themelimin e Komitetit Francezo-Kosovar për mbështetjen e organizimit të Lojërave Mesdhetare Prishtina 2030, si dhe Marrëveshjes së Kredisë me Agjencinë Franceze për Zhvillim (AFD).
Përmes një postimi në Facebook, Gashani tha se këto dy dokumente përfaqësojnë një hap vendimtar në rrugëtimin drejt organizimit të Lojërave Mesdhetare Prishtina 2030 dhe do të mbështesin investimet infrastrukturore në kuadër të përgatitjeve për këtë ngjarje sportive.
“Sot, u shënua një hap vendimtar në rrugëtimin drejt organizimit të Lojërave Mesdhetare Prishtina 2030, me nënshkrimin e Deklaratës së Synimit për themelimin e Komitetit Francezo-Kosovar për mbështetjen e organizimit të Lojërave Mesdhetare 2030, si dhe të Marrëveshjes së Kredisë me Agjencinë Franceze për Zhvillim (AFD), e cila do të mbështesë investimet infrastrukturore në kuadër të përgatitjeve për këtë ngjarje madhore. Që nga dita e parë e marrjes së detyrës si Ministër i Sportit dhe Rinisë, një ndër prioritetet dhe angazhimet e mia kryesore ka qenë pikërisht krijimi i kushteve për realizimin e këtij partneriteti strategjik. Pas muajsh pune intensive, koordinimi institucional dhe bashkëpunimi të ngushtë me partnerët tanë ndërkombëtarë, sot kemi arritur të kurorëzojmë këtë proces me nënshkrimin e këtyre dy dokumenteve të rëndësishme, të cilat hapin një kapitull të ri për sportin dhe zhvillimin e infrastrukturës sportive në Kosovë. Falënderoj Republikën Franceze, Agjencinë Franceze për Zhvillim (AFD), si dhe të gjithë partnerët dhe institucionet që kontribuan në këtë proces. Ky është rezultat i një pune të përbashkët dhe i një vizioni të qartë për ta pozicionuar Kosovën në hartën e organizatorëve të ngjarjeve më të mëdha sportive ndërkombëtare”, ka shkruar Blerim Gashani.
Ai theksoi se që nga dita e parë e marrjes së detyrës si ministër, një nga prioritetet kryesore ka qenë krijimi i kushteve për realizimin e këtij partneriteti strategjik. Sipas tij, pas muajsh pune intensive, koordinimi institucional dhe bashkëpunimi me partnerët ndërkombëtarë, procesi u kurorëzua me nënshkrimin e këtyre marrëveshjeve, të cilat, siç u shpreh ai, hapin një kapitull të ri për sportin dhe zhvillimin e infrastrukturës sportive në Kosovë.
Gashani falënderoi Republikën Franceze, Agjencinë Franceze për Zhvillim (AFD), si dhe të gjithë partnerët dhe institucionet që kontribuuan në këtë proces, duke vlerësuar se ky është rezultat i një pune të përbashkët dhe i një vizioni të qartë për ta pozicionuar Kosovën në mesin e organizatorëve të ngjarjeve më të mëdha sportive ndërkombëtare.
