Ditën e nisën në oborrin e Drejtorisë së Përgjithshme të Policisë së Kosovës.
Krerët shtetërorë, bën homazhe në lapidarin e vendosur me emrat e policëve të rënë gjatë kryerjes së detyrës zyrtare.
Krejt kjo në shënimin e Ditës Memoriale të Zyrtarëve të rënë në detyrë të Policisë së Kosovës.
Nga këtu, U.D e presidentes Albulena Haxhiu vlerësoi kontributin e sakrificën e zyrtarëve policorë për vendin, duke përmendur veçanërisht policët Enver Zymeri e Afrim Bunjaku.
“Të cilët ranë duke mbrojtur integritetin territorial, sovranitetin dhe kushtetutshmërinë. Sot kujtojmë se liria, siguria dhe sovraniteti i shtetit tonë u ngritën edhe mbi sakrificën e policëve të rënë në detyrë, të cilët dhanë gjithçka edhe jetën e tyre për Kosovën dhe qytetarët e Republikës sonë”, u shpreh Haxhiu.
Duke përkujtuar policët e rënë, kryeminsitri në detyrë, Albin Kurti tha se vendi është më i sigurt se më parë dhe institucionet e sigurisë kanë treguar qëndrueshmëri.
“Dita e sotme përputhet me 15-vjetorin e vrasjes së Enver Zymberit, i cili po zbatonte ligjin e Republikës, po mbronte integritetin territorial dhe po garantonte siguri, paqe e të drejta për të gjithë pa dallim…Që prej atëherë, Enver Zymberin e kujtojmë si hero të Kosovës, si hero të shtetësisë dhe pavarësisë sonë”, tha Kurti.
Nga Prishtina, ata u nisën drejt Vushtrrisë.
Fillimisht, në fshatin e lindjes së Afrim Bunjakut bën homazhe te lapidari i tij i vendosur në varrezat e Samadrexhës.
Për të vazhduar më pas në familjen e tij, e që u pritën nga familjarët e Bunjakut.
Pas kësaj, morën rrugën për te familja e Enver Zymerit.
Edhe këtu, ata hynë në konakun e familjes së tij, duke përkujtuar veprën e ish-policit.
Zymeri ishte vrarë më 26 korrik 2011 në vendin e quajtur Varagë, në Zubin Potok.
Ndërkaq, Dita Memoriale përkujton 24 zyrtarë policorë që kanë rënë në krye të detyrës zyrtare.
