Janë pamjet që la pas stuhia në Istog.
Krejt kjo pas motit të ligë që e goditi Kosovën të hënën mbrëma.
E me kushte të ngjashme atmosferike, vendi mund të përballen edhe të mërkurën.
Por, cilat rajone rrezikohen të goditen nga ky, të martën nuk dhanë detaje nga Instituti Hidrometeorologjik i Kosovës.
“Në zona të izoluara nuk përjashtohet mundësia e rrebesheve më intensive, erërave të përkohshme të fuqishme dhe paraqitjes së breshrit.Reshjet do të kenë karakter lokal dhe nuk do të përfshijnë tërë territorin e vendit. Për këtë arsye, disa rajone mund të ketë shiu afatshkurtër, ndërsa në rajone të tjera moti do të mbetet kryesisht i thatë”, kanë njoftuar nga IHMK.
Por, ndryshe nga ky institut alarmin të martën e ngriti Instituti Evropian për Parashikimin Eksperimental të Stuhive.
Këta të fundit, Kosovën e vendosën në nivelin e tretë të rrezikshmërisë.
Për këtë, profesori i mjedisit, Sami Makolli, tregon se çfarë duhet bërë qytetarët kur ka një nivel të tillë të rrezikshmërisë.
“Masat që qytetarët duhet t’i marrin tani, kur niveli i rrezikut është në shkallën tre dhe potenciali për stuhi është i lartë, janë të shmangin lëvizjet e panevojshme. Gjithashtu, duhet të shmangin qëndrimin në vende ku ka pemë, drunj, degë apo pullaze që, si pasojë e erërave të forta, mund të rrëzohen”, ka thënë Makolli.
Për këtë arsye, të martën reagoi edhe Inspektorati Qendror i Punës.
Këta të fundit i bënë thirrje punëdhënëseve, në veçanti ata që veprojnë në sektorët me rrezikshmëri të lartë, t’i ndërmarrin masat e nevojshme për garantimin e sigurisë dhe shëndetit në punë.
“Punëdhënësit duhet të kryejnë kontrollin e pajisjeve dhe mjeteve të punës, ndërsa në mënyrë të veçantë, ata që operojnë në sektorin e ndërtimtarisë duhet të sigurohen për gjendjen teknike dhe qëndrueshmërinë fizike të kranëve dhe pajisjeve të tjera ngritëse në vendpunishte, me qëllim të parandalimit të aksidenteve dhe garantimit të sigurisë së punëmarrësve”, u shpreh Inspektorati Qendror i Punës.
Ndryshe, edhe të martën deri në orët e pasdites, qytete të ndryshme në Kosovë, u përballen me era të forta dhe rrebeshe shiu.
