Profesori Emrush Thaçi ka komentuar zhvillimet e fundit brenda Lidhjes Demokratike të Kosovës, duke folur për sfidat me të cilat, sipas tij, po përballet partia, si dhe për raportet ndërmjet ish-presidentes Vjosa Osmani dhe kryetarit të LDK-së, Lumir Abdixhiku.
Në emisionin “Ditari” në Tëvë1, Thaçi tha se LDK aktualisht ka dy sfida kryesore: përmirësimin e rezultatit zgjedhor dhe tejkalimin e problemeve të brendshme që lidhen me udhëheqjen e partisë.
Sipas tij, edhe pse LDK ka shënuar një rritje të lehtë në zgjedhjet e 7 qershorit krahasuar me zgjedhjet paraprake, rezultati nuk është i mjaftueshëm për ta konsideruar partinë të stabilizuar.
“LDK i ka dy luftëra. E para është rikuperimi nga rezultati i dobët në zgjedhjet e kaluara. Në zgjedhjet e 7 qershorit pati një lëvizje të vogël pozitive, por jo të kënaqshme. Lufta e dytë është nëse LDK do të vazhdojë me këtë kryetar apo jo”, deklaroi Thaçi.
Ai vlerësoi se një koalicion i mundshëm mes LDK-së dhe LVV-së do të ishte i vështirë për t’u realizuar, duke pasur parasysh, sipas tij, ndasitë e thella brenda vetë LDK-së.
Sipas profesorit, në parti ekzistojnë rryma të ndryshme, ku një pjesë mbështet vazhdimin e Lumir Abdixhikut në krye të LDK-së, ndërsa një pjesë tjetër është kundër.
Po ashtu, ai tha se qëndrimet janë të ndara edhe sa i përket mundësisë së një koalicioni me LVV-në.
“Në këtë studio para zgjedhjeve ne e kemi diskutuar çështjen e LDK-së, sidomos hyrjen në zgjedhje me binomin Osmani dhe Abdixhiku, ku në fakt kemi diskutuar dhe kemi thënë që LDK i ka dy luftëra: luftën e ngritjes së atij dështimit paraprak që kishte në zgjedhjet paraprake me zgjedhjet e 7 qershorit ku arriti diçka një lëvizje të vogël por jo të kënaqshme, një luftë e madhe për të cilën faktikisht LDK sot nuk është duke u stabilizuar. Në njëfarë forme apo tjetër LDK është në një para kolapsi shumë të mëdha, lufta e dytë është problemi pas zgjedhjeve do të mbijetojë LDK me këtë kryetar të partisë apo nuk do të mbijetoj, normalisht është në një rrugë jo zgjidhje për arsye se unë nuk e di si do të bëjë një koalicion me LVV-në ku faktikisht problemet e brendshme të LDK-së janë po aq të mëdha. Tendenca e një pjesës së LDK-së është ndarë në disa rryma ku janë pro dhe kundra vazhdimit të kryetarit, njëkohësisht edhe hyrjen në koalicion”, ka deklaruar Thaçi në emisionin “Ditari” në Tëvë1./teve1.info/
