Aleanca ka refuzuar ftesën e kryeministrit në detyrë dhe kryetarit të Lëvizjes Vetëvendosje, Albin Kurti, për një takim me tre kryetarët e partive opozitare.
Lajmin e ka bërë të ditur kryetari i Aleancës, Ardian Gjini, përmes një postimi në rrjetin social Facebook, ku ka publikuar edhe përgjigjen zyrtare të subjektit politik dërguar kryetarit të Lëvizjes Vetëvendosje.
Në letrën drejtuar Kurtit thuhet se qëndrimi i Aleancës mbetet ai i shprehur më 26 qershor, duke e cilësuar atë si të qartë, parimor dhe publik.
Sipas letrës, Aleanca ka bërë të ditur se është e gatshme të ndihmojë në krijimin e kuorumit për zgjedhjen e presidentit të Kosovës, pa kushte apo kërkesa vetjake, nëse mandatari për formimin e Qeverisë pranon gjashtë pikat e ofertës së këtij subjekti politik.
“Më datën 26 qershor kam prezantuar publikisht ofertën tonë për mbështetjen e themelimit të institucioneve të Kosovës.Aleanca është e gatshme pa kushte ose kërkesa vetjake të ndihmojë në bërjen e kuorumit për zgjedhjen e Presidentit-es, nëse mandatari për krijimin e Qeverisë I pranon gjashtë pikat e ofertës sonë. Duke pasur parasysh qëndrimin tonë të qartë dhe parimor, nuk e shohim të nevojshëm takimin”, thuhet në letrën dërguar Kurtit.
Aleanca ka deklaruar se oferta e saj synon zhvillimin ekonomik të Kosovës, forcimin e pozitës ndërkombëtare të vendit dhe shmangien e një procesi të ri zgjedhor.
“Kjo ofertë ka për qëllim që ta shtyjmë përpara zhvillimin ekonomik të Kosovës, forcimin e pozitës ndërkombëtare të vendit, dhe njëkohësisht të mos dërgojë edhe njëherë vendin në zgjedhje”, theksohet në letër.
Gjashtë pikat që Aleanca i pati kërkuar për të ndihmuar në zgjedhjen e presidentit janë:
1. Orientimi strategjik dhe gazi amerikan: Pranimi i menjëhershëm i projektit të gazit amerikan si një projekt i rëndësisë jetike për orientimin afatgjatë të shtetit.
2. Pavarësia energjetike: Nisja e menjëhershme e procedurave për ndërtimin e termocentralit me thëngjill, për të garantuar zhvillim ekonomik dhe ulje të inflacionit.
3. Lehtësime për bizneset e vogla: Ngritja e menjëhershme e pragut të TVSH-së nga 30,000 në 100,000 euro, për të çliruar potencialin e ndërmarrjeve të vogla dhe të mesme.
4. Mbështetje për bujqësinë: Lirimi i plotë i tokës së punuar nga tatimi në pronë, me qëllim nxitjen e punimit të tokës dhe përkrahjen direkte të bujqve.
5. Buxhetimi i infrastrukturës: Financimi i plotë buxhetor i projekteve të infrastrukturës jetike në Kosovë, të cilat aktualisht kanë mbetur të pezulluara në mungesë të mjeteve.
6. Fondi emergjent për kryeqytetin: Ndarja e 800 milionë deri në 1 miliard eurove për Prishtinën, e cila, sipas tij, po bëhet e pajetueshme në mungesë të investimeve kapitale.
Lidhur me postin e Presidentit, Gjini potencoi se ndonëse Aleanca konsideron se Kosova nuk do të kishte president më të mirë se Ramush Haradinaj, ky fakt nuk përbën kusht për procesin. Ai shprehu shqetësimin se mungesa e një marrëveshjeje mes partive të tjera rrezikon ta çojë vendin në krizë permanente. “Ne e mbështesim cilëndo marrëveshje mes partive. Në një vend normal, me politikanë të përgjegjshëm, nuk do të ishte fare e rëndësishme se a zgjidhet së pari presidenti apo qeveria. Kur kjo bëhet temë bllokade, është shkelje e kushtetutës. Ne nuk mund të pajtohemi që Kosova të mbetet në krizë”, tha Gjini, duke shtuar se këto pika mbeten të panegociueshme për mbarëvajtjen e procesit.
Ndryshe, kryeministri në detyrë njëherësh kryetari i Lëvizjes Vetëvendosje, Albin Kurti, ka ftuar në takim kryetarin e Partisë Demokratike të Kosovës (PDK), Bedri Hamza, atë të Lidhjes Demokratike të Kosovës (LDK), Lumir Abdixhiku dhe të Aleancës, Ardian Gjini, për të diskutuar për formimin e institucioneve pas zgjedhjeve të 7 qershorit në ditën kur ka hyrë në fuqi afati kushtetues për konstituimin e Kuvendit.
Ftesa është konfirmuar nga zëdhënësi i Qeverisë në detyrë, Arlind Manxhuka.
“Po, sot në mëngjes Kryeministri Kurti ka dërguar letër për takim tre kryetarëve, të PDK, LDK dhe AAK”, ka thënë Manxhuka./teve1.info/
