Ministri në detyrë i Infrastrukturës dhe Transportit, Dimal Basha, ka njoftuar për diskutimet me përfaqësues të Bankës Evropiane për Rindërtim dhe Zhvillim (BERZH), si dhe ekspertë nga SYSTRA dhe RECURA, lidhur me Raportin Fillestar për Programin e Kosovës për Përmirësimin e Transportit me Autobusë.
Sipas Bashës, ky dokument paraqet pikënisjen e projektit “ANEMBANË”, përmes të cilit synohet krijimi i një sistemi modern dhe të integruar të transportit publik në Kosovë.
Programi parasheh krijimin e një sistemi me biletë të unifikuar, koordinim më të mirë të linjave të autobusëve, investime në infrastrukturë dhe përmirësimin e flotës së autobusëve, me qëllim ofrimin e shërbimeve më cilësore, më të sigurta dhe më efikase për qytetarët.
Ai ka theksuar se zhvillimi i transportit publik modern dhe gjithëpërfshirës është një nga prioritetet e Qeverisë së Kosovës, duke shtuar se Ministria e Infrastrukturës dhe Transportit do të vazhdojë bashkëpunimin me BERZH-in dhe partnerët ndërkombëtarë për realizimin e këtij projekti.
Sipas tij, zbatimi i programit ANEMBANË pritet të ndikojë në përmirësimin e lëvizjes së qytetarëve dhe ta bëjë transportin publik një alternativë më të përshtatshme për të gjithë./teve1.info/
