Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka zhvilluar takim me përfaqësuesit e Institutit GAP, Blendi Hasaj dhe Nora Latifi Jashari, ku është diskutuar mundësia e bashkëpunimit në kuadër të agjendës së reformave të kësaj ministrie.
Sipas MINTI-t, gjatë takimit është diskutuar roli që mund të ketë Instituti GAP përmes ekspertizës së tij në mbështetje të politikave zhvillimore në fushën e industrisë, ndërmarrësisë dhe inovacionit.
Një nga temat kryesore të diskutimit ishte Mekanizmi i Rregullimit Kufitar të Karbonit (CBAM) i Bashkimit Evropian dhe nevoja për informimin më të madh të bizneseve në Kosovë për detyrimet që lidhen me këtë mekanizëm, veçanërisht në proceset e monitorimit, raportimit dhe verifikimit (MRV).
Palët diskutuan gjithashtu mundësinë e bashkëpunimit ndërmjet MINTI-t, odave ekonomike dhe Institutit GAP, si dhe përfshirjen e organizatave të shoqërisë civile në hartimin dhe rishikimin e strategjive zhvillimore.
Ministrja Kusari-Lila ka theksuar se bashkëpunimi ndërmjet institucioneve publike, sektorit privat dhe shoqërisë civile është i rëndësishëm për avancimin e reformave, rritjen e konkurrueshmërisë ekonomike dhe përshpejtimin e procesit të integrimit evropian të Kosovës./teve1.info/
