Ministria e Arsimit dhe Shkencës (MASh) do të mbështesë edhe gjatë vitit shkollor 2026/2027 nxënësit e Arsimit dhe Aftësimit Profesional (AAP), përmes ndarjes së 100 bursave.
Sipas MASh-it, kjo masë synon të nxisë regjistrimin e nxënësve në drejtimet deficitare, si dhe të rrisë pjesëmarrjen e vajzave në drejtimet teknike, në përputhje me nevojat e tregut të punës.
Bursat u dedikohen nxënësve të klasës së dhjetë në institucionet e Arsimit dhe Aftësimit Profesional dhe kanë vlerë prej 50 eurosh në muaj, përkatësisht 500 euro për një vit shkollor, pa përfshirë muajt korrik dhe gusht.
“Mbështetja financiare do të vazhdojë për tri vite të shkollimit, në bazë të kritereve të përcaktuara”, bëhet e ditur në njoftim.
Nga 100 bursat e ndara, 70 do t’u dedikohen nxënësve që regjistrohen në drejtimet deficitare, ndërsa 30 janë të rezervuara për vajzat që zgjedhin drejtimet teknike.
Afati për aplikim është nga 9 korriku deri më 1 tetor 2026.
“Nxënësit duhet të dorëzojnë aplikacionet dhe dokumentacionin përkatës në institucionet e Arsimit dhe Aftësimit Profesional, ndërsa drejtorët e këtyre institucioneve do t’i përcjellin aplikacionet në MASh deri më 5 tetor 2026”, theksohet në fund të njoftimit./teve1.info/
