Gjashtë muaj më parë, i mbijetoi një votëbesimi.
Mirëpo, tash pas rezultatit të zgjedhjeve të 7 qershorit, kryetarit të LDK-së, Lumir Abdixhiku, sërish po i kërkohet dorëheqja nga një pjesë e partisë.
Madje, për këtë u raportua se në LDK ka nisur edhe mbledhja e nënshkrimeve për të hedhur në votim shkarkimin e Abdixhikut.
Sot, në LDK për një takim me Abdixhikun, erdhi kandidatja për Presidente, Vjosa Osmani.
Ajo deklaroi se deri më tani nuk është deponuar asnjë nënshkrim për shkarkimin e Abdixhikut, duke refuzuar që të flas më gjatë për këtë temë.
“Jam deklaruar për këto tema më herët. Vlejnë të njëjtat”, u shpreh ajo gjatë ditës.
Televizioni ka provuar gjatë gjithë ditës që të marrë një përgjigje zyrtare nga LDK për këtë temë, mirëpo nuk ka pranuar përgjigje.
Për këtë çështje kanë refuzuar të flasin edhe të gjithë anëtarët e kryesisë.
Ndryshe nga ta, ish-kandidati i LDK-së për deputet, Jeton Kelmendi, kërkesën për dorëheqje e konsideron si normale.
“Ndoshta jam i pari në LDK që kam kërkua ose ndër të parët që LDK duhet të zgjedh një figurë të re, jo pse kam diçka kundër Lumir Abdixhikut por LDK-së i duhet një frymë e re, një menaxhment komplet i ri dhe një reforme e brendshme jo vetëm në ndryshim të kryetarit dhe kryesisë që do të mund të dalin edhe nënkryetarë dhe të tjerë por ndryshim edhe i konceptit. LDK-ja është zyrtarisht pjesë e partive popullore evropiane, duhet që programin ta ketë në këtë frymë dhe natyrisht nuk duhet të largohet nga fryma e ish presidentit Rugova si themeltar i LDK-së por edhe i Kosovës dhe këtij shtetit”, shprehet ai.
Në tri palë zgjedhjet nacionale me Abdixhikun në krye, Lidhja Demokratike e Kosovës është renditur e treta.
Më 9 shkurt 2025, LDK mori 18.27%. 10 muaj më vonë, LDK ra në 13.24 për qind, kurse në zgjedhjet e fundit, ato të 7 qershorit, u rrit në 16.69%.
