Kryeministri në detyrë i Kosovës, Albin Kurti, ka njoftuar se të premten janë shpallur 643 fermerë ndërmarrës përfitues nga gjithsej rreth 1 mijë e 200 aplikues për grante në industrinë agro-përpunuese.
Kurti ka thënë se ky është një rekord në mbështetjen publike për investime në bujqësi.
“Për herë të parë në historinë e Republikës së Kosovës shpallet një numër kaq i madh përfituesish të një skeme publike investimesh në një proces të vetëm,” ka deklaruar ai.
Sipas tij, rreth 35 për qind e përfituesve janë gra, ndërsa një pjesë e konsiderueshme janë të rinj që e shohin bujqësinë dhe sipërmarrjen rurale si mundësi zhvillimi.
Ai ka theksuar se përmes kësaj mase po mbështeten sektorë me potencial të lartë, si agroturizmi, përpunimi i produkteve bujqësore, prodhimi i mjaltit, kultivimi i bimëve mjekësore dhe aromatike, si dhe akuakultura.
“Përmes kësaj mase po mbështeten sektorë me potencial të lartë zhvillimor, si agroturizmi, përpunimi i produkteve bujqësore, prodhimi i mjaltit, kultivimi i bimëve mjekësore dhe aromatike, akuakultura dhe aktivitete të tjera që krijojnë më shumë vlerë të shtuar,” ka shkruar Kurti në Facebook.
Ai ka shtuar se Kosova tashmë është bërë edhe bashkinvestuese në programe të këtij niveli, duke përmendur vitin 2023 si një pikë kthese në këtë drejtim.
Kurti ka shprehur mirënjohje për Qeverinë e Gjermanisë, Ambasadën Gjermane dhe GIZ-in për mbështetjen e vazhdueshme ndaj Kosovës.
“Qeveria e Kosovës tashmë e ka vendosur fermerin dhe bujkun në qendër të politikave bujqësore. Mbi 350 milionë euro dhe me rreth 150 mijë përfitues është mbështetja direkte financiare përgjatë qeverisjes sonë,” ka theksuar ai.
Ai ka thënë se bujqësia mbetet sektor i rëndësishëm për ekonominë e vendit, duke përbërë 7.3% të Bruto Produktit Vendor.
“Siguria ushqimore është jetike për shëndetin e qytetarëve. Që të bëjmë sa më pak, mundësisht aspak analiza pacientësh në spitale është e nevojshme të kemi sa më shumë, gjithnjë e më shumë analiza ushqimesh që na servohen. Prandaj, do t’ju mbështesim për standardizim e certifikim. Cilësia dhe ligjshmëria janë hovi i ardhshëm i shtimit të eksporteve, i zëvendësimit të importeve dhe i konkurrueshmërisë evropiane”, ka thënë Kurti.
Në fund, ai ka theksuar se “suksesi i fermerëve dhe prodhuesve është edhe suksesi i Republikës së Kosovës.”/teve1.info/
