Kryetari i Prishtinës, Përparim Rama, ka kritikuar ashpër Qeverinë e Kosovës, duke e akuzuar për izolim ndërkombëtar, humbje të fondeve të Bashkimit Evropian dhe dëmtim të ekonomisë së vendit.
Në një reagim publik, Rama tha se pasojat e politikave të Qeverisë tashmë po ndihen nga bizneset, punëtorët dhe fermerët.
“Sot po shohim biznese që mbyllen. Po mbesim pa fonde të Bashkimit Evropian, ndërsa amerikanëve, për projektin e gazit, iu përgjigjëm me arrogancë: ‘Ne kemi ide më të mirë'”, ka deklaruar Rama.
Sipas tij, Kosova po humb investime dhe vende pune, ndërsa qytetarëve nuk po u krijohen mundësi për zhvillim ekonomik.
“Po humbim investime, po humbim vende pune, po humbim dinjitetin ekonomik të vendit. Ndërkohë, kjo qeveri po përpiqet t’i mbajë qytetarët peng të lëmoshave dhe premtimeve elektorale prej 100 eurosh, në vend që t’u krijojë mundësi dhe t’i lejojë të jetojnë me punën e tyre”, u shpreh ai.
Rama e cilësoi situatën si pasojë të një qeverisjeje të dështuar.
“Kjo është fatkeqësia që po e jeton Kosova si rezultat i një qeverie autokrate, të paaftë dhe papunëtore”, tha ai.
Në reagimin e tij, kryetari i Prishtinës tha se Bashkimi Evropian po i ridrejton fondet drejt vendeve të rajonit, ndërsa Kosova vazhdon të mbetet nën masa ndëshkuese.
“Bashkimi Evropian po ridrejton fondet drejt Shqipërisë, Malit të Zi dhe Maqedonisë së Veriut. Kosova mbetet jashtë. Qeveria e Albin Kurtit na ka lënë nën masa ndëshkuese dhe larg partnerëve tanë”, deklaroi Rama.
Ai iu referua edhe situatës së fabrikës së qumështit Vita, duke thënë se pasojat po i bartin punëtorët, fermerët dhe bizneset vendore.
“E kur flasim për pasojat, sot e pagoi fabrika e qumështit Vita. E pësuan punëtorët. E pësuan fermerët. E pësuan pronarët. Nesër kush?”, pyeti ai.
Rama shtoi se Kosova po largohet nga aleatët e saj strategjikë dhe se zhvillimet e fundit janë shqetësuese për të ardhmen ekonomike të vendit.
“Kosova po ua kthen shpinën aleatëve që ndërtuan rrugën e lirisë dhe shtetësisë sonë, por edhe qytetarëve të saj që, me mund e përkushtim, ndërtuan fabrika dhe krijuan vende pune në Kosovën e lirë. Pamjet e sotme të kujtojnë vitet e ’90-ta, kur regjimi serb i largonte shqiptarët nga vendet e punës. Kjo është e dhimbshme dhe alarmuese”, përfundoi Rama.
