Autor: Arlind Beqiraj
Një përleshje me armë zjarri ka lënë të plagosur katër persona mesditën e sotme në sheshin kryesor të Podujevës.
Njëri shihet i plagosur e i shtrirë në tokë.
E dy të tjerë po e vazhdojnë përleshjen fizike me armë.
E gjithë kjo skenë u pa mesditën e së enjtes në qendër të Podujevës.
Por, tragjedinë duket se arriti ta parandalojë një polic, i cili qëlloi në afërsi.
Megjithëkëtë, bilanci i të shtënave me armë zjarri, la 4 të plagosur në sheshin kryesor.
Për këtë të plagosurit u transportuan me urgjencë drejt Qendrës Klinike Universitare në Prishtinë.
Drejtori i Emergjencës, Naser Syla, për tëvë1, tha se gjendja e tyre është stabile.
“Ne qendrën emergjente janë sjell katër pacientë me lëndime të rënda me armë zjarr. Disa prej tyre i kane perfunduar ekzaminimet e nevojshme dhe gjendja e tyre është stabile, por e njërit është e rëndë”, theksoi Syla.
Tëvë1 mëson se tre nga katër të përfshirët kanë lidhje familjare nip e dajë mes vete.
Ndërsa njëri nga të plagosurit, ishte kalimtar i rastit.
Për këtë, në vendngjarje dolëm menjëherë organet e rendit.
“Si pasojë e përdorimit të armës janë plagosur katër persona. Tre prej tyre kanë qenë të përfshirë në incident, ndërsa njëri është kalimtar i rastit, i cili për fat të mirë ka lëndime të lehta trupore”, deklaroi Basei Shabani, nënkolonel i Policisë.
Shabani, thotë se motivet e kësaj ngjarje ende nuk dihen.“Kanë lidhje familjare dhe problemi është familjar, por për motivin ende nuk dihet asgjë”
Për ekzaminimin e vendit se ku ndodhi plagosja, i’u deshën disa orë ekipeve të forenzikës ku u panë edhe armët që u përdorën në këtë rast.
